Ich Friedreich der Schröfel von Nusdorff vnd ich Dorothea sein hausfrow vnd alle vnser erben wir vergehen vnd tun chunt offenleichen mit dem brief, daz wir mit aller vnser erben guetem willen vnd gunst, mit wolbedachtem muet vnd mit gesampter hant vnd nach vnser nachsten freunt Rat, zu der zeit, do wir ez mit recht wol getun mochten, durch vnser vnd vnser nachkomen selnhail willen recht vnd redleichen gemacht vnd geben haben vnd machen vnd geben mit dem brief auf vnser weingarten, dez ein zwelftail eins Jeuchs ist vnd haizzt daz Mistelbechl vnd ist freys aygen vnd leit hinder Nusdorff zenechst hern Hannsen dez Wortenfelser weingarten, also daz wir vnd alle, die daz vorgenant vnser weingaertl nach vns innen habent vnd besitzent, alle iar sullen dauon raihen vnd dienen dem Gotshaws vnser frown datz den Schotten ze Wienn zwen wienner phenning an sand Michels tag zu rechtem gruntdienst vnd nicht mer. Wir sein auch der vorgenanten zwayer wienner phenning diensts gruntrechts auf dem vorgenanten vnserm weingarten ir recht gewern vnd scherm für alle ansprach, als gruntdiensts recht ist vnd dez lanndes recht ze Osterreich. Vnd wann ich obgenanter Fridreich der Schröfel von Nusdorff vnd ich Dorothea sein hausfrow selb nicht aygen Insigil haben, so geben wir in den brief versigilt mit der zwayer erbern mann Insigil Leupolts des Hormarkchter von der Heiligenstat vnd Seyfritz dez Schekchen von Nusdorff, die wir paid vlaizzichleich darvmb gepeten haben, daz si dez gemachtes vnser geczewgen sind mit iren Insigiln, in paiden an schaden. Wir verpinden vns auch vnder ir paider Insigil mit vnsern trewn, stet ze haben, daz vorgeschriben stet an dem brief, der geben ist ze Wienn nach Christi gepurd drewczehenhundert Jar darnach in dem sechs vnd newnezigistem Jar, dez nechsten eritags vor dez heiligen chrewtztag, als ez erhocht wart.

Source Fulltext: HAUSWIRTH, Schotten (=FRA II/18, 1859) S. 446-447