Ich Wolfhart der Dachsenpech ze Hagenprunn Vergich für mich vnd für all mein Erben vnd tun chunt offenbar mit dem prieff alle den, dew in sehent oder hörnt lesen, die nu lebent vnd hernach chünfftig sind, daz ich mit aller meiner Erben guten willen vnd gunst vnd auch mit gesamter hant meiner na^echsten vnd pesten vrewnt Rat czu der czeit, do ich es mit recht wol getu^en macht vnd auch recht ze tu^en het, eynen widerwechsel getan hab mit eim gantzen Jewch weingarten gelegen ze Hagenprunn an den Süben mit aym Raynn zenachst dem Hawbmer mit Perchrechtdienst vnd auch czehent, daz mein vreys aygens gut gebesen ist, mit alle den rechten vnd nützen, als ich dazselb gut vnuersprochenleich in aygens geber herpracht hab vnd auch mit alter herchomen ist. Dazselb gut hab ich geben zu einem widerwechsel dem sa^eligen Gotzhaws datz sand Veit vnd auch dem Erbern herren hern Niclasen, die zeyt Pharrer daselbs, vnd allen seinen nachcho^emen, ledichleich vnd vreileich ze haben vnd all irn frumen damit schaffen, wie ez dem obgenanten Gotzhaws vnd eim ygleichen pharrer allerfu^egleichst ist. Darvmb habent sew mir zu einem widerwechsel herwidergeben der obgenant her Niclas mit der ganczen gemayn wiln in der Pharr, wann de weisissten dapey gebesen sind, irs rechten aigen gutz von dem gotzhaws ein hofstat, gelegen ze Hagenprunn mit aym raynn zenachst Jacobs dez Hawer haws pey dem Wazzer Ganch, mit aller zuho^erung, ze veld vnd zu darff, dienst vnd Roboten, waz darauf gebesen ist, alz deselb hofstat mit alter her ist cho^emen. Daz lüb wir mit vnsern trewn an aiz stat, allez daz sta^et ze haben, daz var an dem priff geschriben stet. Daz die sach vnd der widerwechsel vnd auch die hanndlung also sta^et gantz vnd vnczebrochen beleib, darv^eber so geb wir, ich obgenanter Wolfhart der Dachsenpechk mitsamt all meinen Erben, dem oftgenanten gotzhaws datz sand Veit vnd auch dem Erbern herren hern Niclasen, die zeit Pharrer daselbs, vnd all seinen nachcho^emen in aln den priff zu einem warn vrchund der sach versigelt mit meyn selbs insigel. Vnd durich pesserrer sicherhait hab ich auch gepeten meyn vetern pa^ed, den Erbern Chunraten den Dachsenpechen ze Charnnebrunn vnd auch den Erbern Wolfgangen von Russt, daz sew der sach geczewg sein mit irn anhangunden insigeln. Der prieff ist geben nach Christi gepurd in dem ayns vnd virczehen Hundertissten Jar, an dem achstag.

Source Fulltext: HAUSWIRTH, Schotten (=FRA II/18, 1859) S. 476-477