Ich Vlreich von Meyssaw, Obrister Marschalich in Osterreich, Bekenn mit dem brieff, Das für mich chomen ist Stephann der Laher vnd hat mit meinen handen, Willen vnd gunst gefügt vnd gemacht den Erbern Tyboltten vnd Hanssen geprudern den Floytten dy gütter, als sew da hernach verschriben stent. Von erst zw Prawnsstorff achczehen schilling mynner zweliff phenning geltz awff pehawstem guett. Item zw Frawndorff ain veldlechen vnd zwen vnd sechzig phenning geltz awff pehawstem guett vnder dem Chirichpüchel, vnd ain holzel genant in dem Ars, alles daselbs zw Frawndorff gelegen, dye alle von mir ze lechen gent, mit allen iren zwgehorung, als sew von alter herchomen sind, als lechens vnd landes vnd gemechtes recht ist in Osterreich. Dye vorgenanten guetter alle miteinander mit allen iren nuzen vnd rechten hab ich geruech zw verleichen vnd hab verlichen den vorgenantten Tybolt vnd Hanssen geprudern den Floytten vnd iren Erben in allen den rechten, sam vor an disem brieff benant ist. Vnd des handels vnd gemechtes gyb ich in den gegenwurtigen brieff versigilten mit meinem anhangundem Insigl. Geben nach Christi gepurd virzehen hundert Jar darnach in dem andern Jar, an sand Merteins Tag.

Source Fulltext: HAUSWIRTH, Schotten (=FRA II/18, 1859) S. 481-482