Ich Stephan der Alhartspechk Vergich für mich selbs vnd für all mein erben, Daz ich mit guetem muet vnd mit guetem willen geschafft hab zu der zeit, do ich gesunt gewesen pin von den gnaden Gots, pei liechtem tag, vor den erbergen geswarn Schephen ze Pulka vnd vor dem Richter Jörgen dem Frewnt meinen halben weingarten, der genant ist der Graw¨zzler vnd gelegen ist zenachst dem Henifler gen Pulka marchthalben, vnd denselben halben weingarten hab ich in der mazz geschafft vnd aufgeben den erbergen purgern ze Pulka vnd dem Gawster, der yczvnd zechmaister ist, oder wer nach im Czechmaister wiert, daz der daz Liecht dauon law¨chten schol nach vnd tag, daz do hanngt ob der tuer, do daz heilig pluet vnd Gotsleichnam inn rastet, ewichleich schol welawcht werden. Wër aber, daz daz nicht geschech, daz daz Liecht nicht prunn vnd ein tag oder ein nacht verzogen wuerd, daz ez nicht prunn, so schol der zechmaister ein phfunt wachs veruallen sein den purgern ze Pulka in ir pruederschafft an all genad all tag, wann daz Liecht nicht prunn, also, daz sich ein tag vergieng, daz daz Liecht nicht prunn. Vnd derselbig halb weingarten, der genant ist der Graw¨zzler, der purchrecht von meinem genedigen herren ist Graf Hannsen von Maydburg, vnd dient fumczehen phennig auf sand Michels tag ze purchrecht vnd nicht mer, vnd den halben weingarten, der genant ist der Graw¨zzler, vnd daz geschefft enphilch ich Stephan der Alhartspekch pekch den obgenanten geswarn erbergen purgern vnd wer Czechmaister ist dacz dem heiligen pluet vnd Gotsleichnam, auf ir Sel vnd trew, als si vnserm herren an dem Jungsten gericht douon schullen antbuerten. Vnd des zu ainer waren urchund gib ich obgenanter Stephan der Alhartspekch den prief versigelten mit meinem aigenn anhangunden Insigl. Vnd darczu hab ich gepeten di erbergen ped Vlreichen den Potenprunner vnd Rattpern von Rosenhart, daz sew des gescheffts geczeugen sind mit irn aygenn anhangunden Insigeln, in vnd allen irn erben an schaden. Daz ist geschehen, do man zalt von Christs gepurd vierczehenhundert Jar vnd darnach in dem vierden Jar, des phfincztags in der andern wochen nach Ostern.

Source Fulltext: HAUSWIRTH, Schotten (=FRA II/18, 1859) S. 485-486