Wir Chunrad der Vorlawf, zu den zeiten Purgermaister, vnd der Rat Gemayn der Stat ze Wienn Vergehen vnd Tun kund offenleich mit dem brif, Das weilent der erber man Chunrat der Hawbner, dem Got gnad, zu vnser Stat Gruntpuch gelegt hat zwelfphunt wienner phenning fuer die zwelff schilling wienner phenning geltes purkchrechts, die sand Niklas alter gelegen in sand Michels pharkirchen ze Wienn gehabt hat auf seinem haws, gelegen an der herczogen hof ze Wienn zenechst dem haws, daz weilent Hainreichs des Preterchleuber gewesen ist, vnd der der erwirdig herr her Antony Brobst dacz sand Stephan ze Wienn nicht abczelosen geben wolt nach der brif sag vnd lauttung, die wir von furstleicher gab darumb haben. Vnd darumb so sagen wir des vorgenanten Chunrats des Hawbner witiben frawn Margreten vnd alle die, die daz egenant haws innehabent vnd besiczent, derselben gu^elt darab ledig vnd los vor aller ansprach, also, daz furbas alle die brif vnd vrkund, die furbracht wurden, alsuerr sy dasselb purkchrecht berurent, sollen genczleich tod vnd zenichtew sein vnd chain chrafft mer haben, weder chlain noch gros. Vnd darüber ze einem warn offen vrkund vnd getzeug geben wir in den brif versigilten mit der vorgenanten Stat ze Wienn Grunnt anhangundem Insigil. Der geben ist ze Wienn, nach Kristes geburde virczehenhundert Jar darnach in dem virden Jar, an sand Veyts abend.

Source Fulltext: HAUSWIRTH, Schotten (=FRA II/18, 1859) S. 486-487