Wir Leupolt von gots gnaden Herczog ze Osterreich, ze Steyr, ze Kernden vnd ze Krain, Graf ze Tyrol etc., Bekennen, daz für vns kom vnser getrewr Ott Wölfelstorffer von Behaymischen Krud vnd batt, daz wir im geruchten zu verleihen zway phunt vnd drey Schilling phenning gelts, gelegen zu Höflein bey Behaymischen Krud, vnd ain phunt phenning gelts zu Reyntal gelegen, wan vns die von weilent Hannsen Schonstrazzer seinem vettern ledig weren worden. Das haben wir getan vnd haben den egenanten Otten Wölfelstorffer vnd seinen erben die obgenanten phunt phenning gelts von sundern gnaden verlihen vnd leihen auch wissentleich, was wir in ze Recht daran leihen sullen oder mugen, die nu furbass von vns, vnsern Brüdern, Vettern vnd erben in Lehensweis innezehaben vnd ze nyessen, als Lehens vnd Landes Recht ist, doch also, daz sy vns dauon tun, als Lehensleut irem Lehenherren billeichen tun sollen vngeuerleichen. Mit vrchund dicz briefs. Geben zu Wienn an dem Heiligen Auffart Abent, nach Christs gepurde Vierczehen Hundert Jar vnd darnach in dem Sibenden Jare.

Source Fulltext: HAUSWIRTH, Schotten (=FRA II/18, 1859) S. 501