Ich Jorig der Stuchs von Trautmanstorf vergich offenleich mit dem brief für mich vnd all mein Erben, daz ich mich gantz vnd gar verrichtet vnd veraynt han mit den erbern geystleichen frawn, Swester Kathrein der Hewnyngerinn zu den zeiten priorynn vnd dem Conuent gemain datz der Hymelporten ze Wienn des Ordens von premonstrey, vmb die ansprach vnd vodrung, so ich hintz in han gehabt von des Öden Hawses wegen, gelegen daselbens pey der Hymelporten zenegst der padstuben, also, daz ich mich desselben Öden Hawses vertzigen vnd fürzicht getan han vud vertzeich auch mich des gantz vnd gar mit dem brief, daz ich noch all mein Erben noch ander yemant von vnsern wegen furbas hintz demselben Haws nymermer chain ansprach noch vodrung haben noch gewinnen sullen in dhain weyse an geuer, sunnder daz die vorgenanten geystleichen frawn vnd ir Nachkomen sullen furbas dasselb Haws ledikleich vnd freileich haben und allen iren frumen damit schaffen, verkawffen, versetzen vnd geben, wem sy wellen, an allen irrsal. Mitt vrchund des briefs versigilten mit meinem anhangunden Insigil vnd mit des erbern Insigil Wolfgangs des Vischamunder, den ich des gepeten han, daz er der Sach gezeug ist mit seinem anhangunden Insigil, im vnd seinen Erben an schaden. Der brief ist geben ze Wienn nach Kristi geburd viertzehenhundert Jar darnach in dem Newntten Jar des negsten Sambtztags vor sand Symons vnd sand Judas Tag der Heyligen zwelifpoten.

Source Fulltext: HAUSWIRTH, Schotten (=FRA II/18, 1859) S. 511