Ich Chunrat der Matseber, ich Hainreich der Walich vnd ich Jörg Örnpekch, baid sein Aydem, wir veriehen fur uns vnd fur all vnser erben vnd tun chund allen den, die den brief lesent oder hörent lesen, die nv lebent vnd hernach chünftig sind, das wir mit gutem willen, mit wolbedachtem mut vnd nach Rat vnserr frewnt, zu der zeit, da wir es wol getun mochtten, vns liepleich vnd frewntleich verebent vnd berichtet haben mit dem erbern Kristann dem Hawtzenperger vnd mit frawn Magdalen seiner hawsfrawn vmb alle die henndel vnd sach, die sich zwischen vns ze paider seytt verlauffen habent vntz auf den hewtigen tag, nichts ausgenomen, alles inbeslozzen, also beschaidenleich, das wir vnd all vnser erben noch ander nyemant von vnsern wegen furbas hintz dem egenanten Kristann dem Hawtzenperger, hintz frawn Magdalen seiner Hawsfrawn vnd hintz allen irn erben von der obgenanten henndel vnd sach wegen, die sich zwischen vns verlauffen habent, als vorgeschriben stet, nymermer chain ansprach noch vodrung haben noch gewinnen noch chains Rechtens hintz in darumb jehen sullen, weder mit worten noch mit werchen, in chainerlay weis, an alles geuer. Vnd sullen auch si das haben auf vns vnuerschaidenleich und auf allem vnserm gut, das wir haben in dem Lannde ze Österreich oder wo wir es haben, wir sein lebentig oder tod. Vnd das die sach furbas also stet vnd vntzebrochen beleib, darüber so geben wir obgenant, ich Chunrat der Matseber, ich Hainreich der Walich vnd ich Jörg Örnpekch, fur vns vnd fur all vnser erben in den brief zu einem warn vrchund der Sach versigilten mit vnsern angehangen Insigiln. Der brief ist geben nach Christi gepurd virtzehenhundert Jar darnach in dem zehenten Jar, an sand Erharts Tag.

Source Fulltext: HAUSWIRTH, Schotten (=FRA II/18, 1859) S. 513