Ich Kristan der Hawtzenperger vergich fur mich vnd fur all mein erben vnd tun kund offenleich mit dem brief, das ich gelobt han ze geben meiner hawsfrawn Magdalen Sybentzig phunt wienner phenning ze rechtter Morgengab nach des Lanndes Recht ze O^esterreich vnd hab ir die rechtt vnd redleich gemachtt mit aller meiner erben gutem willen vnd gunst, mit wolbedachtem mut vnd nach Rat meiner frewnt, zu der zeit, da ich es wol getun mochtt, auf den hernach geschribenn gutern. Von erst auf meinem Hof, gelegen ze Ladendorf zenechst Chuntzlein dem Trew, der rechts freys aygen ist vnd leit in dem Winkchel, vnd auf meinem weingarten, gelegen in dem Ruedoltsperg, des ein virtail ist, der purkrecht ist, dauon man jerleich dint Newn phenning ze purkrecht, vnd auf meinem akcher, gelegen in dem veld, der auch purkrecht ist von dem edeln herren hern Chunraten dem Wehinger, dem man jerleich dauon dint Sechtzehen phenning an Sand Jörgen tag ze purkrecht vnd nicht mer, vnd alles das, das zu den vorgenannten Gütern gehöret, ze veld vnd ze dorff, es sey gestifft oder vngestifft, versucht (sic), wie das genant ist, also mit ausgenomen worten, das die vorgenanten Sibentzig phunt Morgengab nach meinem vnd der egenanten meiner hawsfrawn tod erben vnd geuallen sullen auf vnser baider chinder, die wir miteinander haben oder gewinnen. Wer awer, das ich obgenanter Kristan der Hawtzenperger abgieng mit dem tod, ee denn die vorgenant Magdalen mein Hawsfraw, vnd das ich ir nicht kind liezz, die wir miteinander hieten, oder ob ich ir chind liezz, die wir miteinander hieten, dennoch sol si die vorgenanten Sibentzig phunt Morgengab auf den vorgenanten Gütern vnd irn zugehorungen in nutz vnd in gewer innhaben, nützen vnd niessen vnuerchumert vntz an irn tod, als Morgengab Recht ist vnd des Lanndes Recht ze Österreich. Vnd nach irn tod sullen denn dieselben sybentzig phunt herwider erben vnd geuallen auf mein nachst erben, darauf si denn ze Recht erben vnd geuallen sullen, an allen Krieg vnd Irrsal. Ich pin auch mitsampt meinen erben vnuerschaidenleich der vorgenanten Güter vnd irr zugehörung, als vorgeschriben stet, der egenanten Magdalen meiner Hawsfrawn recht gewern vnd scherm für alle ansprach, des Aygen, als Aygens Recht ist, des Purkrecht, als Purkrechts Recht ist vnd als Morgengab vnd des Lanndes ze Österreich Recht ist. Wêr aber, das ir mit Recht daran icht abgieng, oder ob ir mit Recht icht krieg oder ansprach daran auferstund, von wem das wer, was si dez schaden nympt, das sullen wir ir alles ausrichtten vnd widerchern an allen irn schaden, vnd sol auch si das haben auf vns vnuerschaidenleich vnd auf allem vnserm gut, das wir haben in dem Lannde ze Österreich oder wo wir es haben, wir sein lebentig oder tod. Vnd das das gemechtt fürbas also steˆt vnd vntzebrochen beleib, darüber so gib ich obgenanter Kristan der Hawtzenperger fur mich vnd fur all mein erben der offtgenannten meiner hausfrawn in dem vorgeschribenn Rechten den brief zu einem warn vrchund der sach versigilten mit meinem anhangunden Insigil. Dartzu so hab ich gepeten die erbern Erharten den Motz vnd Mertten den Strewchel, das si der sach getzewgen sind mit irn anhangunden insigiln, in vnd irn erben an schaden. Der brief ist geben nach Kristi gepurd Viertzehenhundert Jar darnach in dem zehenten Jar, an sand Vlreichs tag.

Source Fulltext: HAUSWIRTH, Schotten (=FRA II/18, 1859) S. 517-518