Ich Niclas, Wernharts des Satler seligen Sun, vergich fur mich vnd fur all mein erben vnd tun kund offenleich mit dem brief vmb die Kram, die gelegen ist in Frantzen des Tuchscherer seligen haws an dem Hohen Markcht ze Wienn gegen den Tuchlawben vber, der mich der Erwirdig geistleich herr her Thoman, Abbt des Gotzhawses vnser frawn datz den Schotten ze Wienn, in sein Gruntpuch nutz vnd gewer geschriben hat, das ich vnd all mein erben vns des gegen demselben Abbt Thoman vnd gegen seinen Nachkomen mit vnsern trewn an alles geuer verlubt vnd verpunden haben, luben vnd verpinden auch vns gegen in wissentleich mit dem brief also beschaidenleich, ob das wer, das si darumb icht krieg oder zuspruch gewunnen, von wem das wer, was si des schaden nement, das sullen wir in alles ausrichten vnd widerchern an allen irn schaden. Vnd sullen auch si das haben auf mir vnd meinen erben vnuerschaidenleich vnd auf allem vnserm gut, das wir haben in dem lannde ze Österreich oder wo wir es haben, wir sein lebentig oder tod. Vnd wann ich selber nicht aygen Insigil hab, des ze vrchund gib ich fur mich vnd fur mein erben in den brief versigilten mit der zwayrr erbern mann Insigiln hern Symons des Zingiesser, dietzeit des Rats der Stat ze Wienn, vnd Hannsen des Gerestenner, purger daselbs, die ich des vleissichleich gepeten hab, das si der sach getzewgen sind mit irn anhangunden Insigiln, in an schaden. Vnd verpind mich auch mit meinen trewn vngeuerleich vnder irn Insigiln, alles das stet ze haben, das vor an dem brief geschriben stet, der geben ist ze Wienn nach Christi gepurd Viertzehenhundert Jar darnach in dem Ayndleften Jar, an sand Valteins tag.

Source Fulltext: HAUSWIRTH, Schotten (=FRA II/18, 1859) S. 518-519