Ich Chunrat von Wehing bechenn für mich vnd für all mein erben vnd tun chunt offenleich mit dem prief, daz ich mit gutem willen vnd wolbedachtem mut zu der czeit, da ich es wol getun mocht, recht vnd redleich von gnaden gegeben hab vnd gib auch wissentleich mit dem prief dem erbern Hannsen dem Pucher, meinem diner vnd seinen erben aynen halben weingarten, der gelegen ist ze Ladendorf an dem Altenperg zenechst des pharrer weingarten daselbs ze Ladendorf an ayn tail vnd zenechst des Widmer weingarten an dem andern tail, der mir von dem pharrer von Hörnleins mit dem tod ledig worden ist, vnd des rechtter perkherr pin mit stiften vnd mit störn, dauon man mir vnd meinen erben järleichen dient ainen halben emmer weins ze perkrecht vnd nicht mer, also beschaydenleich, daz der egenant Hanns der Pucher vnd sein erben vmb die dinst, so er mir getan hat vnd noch hinfur tun sol, sullen furbas den egenanten halben weingarten ledigleichen vnd freyleich haben vnd allen im frum damit schaffen, verchawfen, verseczen, machen vnd geben, wem si wellen, vnd alles das damit tun vnd handeln, daz in allerpest fugt oder wolgeuellt, an all Irrung vnd hindernuzz, doch mit meiner oder meiner erben hannden, als perkrechts vnd des landes ze Österreich recht ist vngeuerleich. Ich pin auch desselben halben weingarten ir rechtter gewer vnd scherm für all ansprach nach des landes recht ze Österreich. Vnd daz die sach fürbas also stet vnd vntzeprochen beleib, vnd des ze vrchund gib ich obgenanter Chunrat der Wehinger fur mich vnd mein erben in den brief versigelten mit meinem anhangunden Insigil. Geben nach Christes gepurd viertzehenhundert Jar darnach in dem aylftem Jar, des vreytags vor vnsern frawntag der Liechtmess.

Source Fulltext: HAUSWIRTH, Schotten (=FRA II/18, 1859) S. 521