Ich Niclas der Freunt, Jörgen des Freunts pruder ze Pulka, ich Kathrey sein hausfraw vnd all vnser erben vergehen offenlich mit dem brief, das wir mit bolbedachtem mut vnd gutleichem willen vnd mit gesampter hant zu den zeiten, da wir das mit recht wol getun mochten, recht vnd redleich verchaufft haben vnser virtail weingarten, das gelegen ist ze Leutakker inn Lussen, zenachst Merten des Wachter weingarten von Starein, mit Vlreichs des Nesleins handen, die zeit Richter ze Leutakker, Stifter vnd storer an des edeln vnsers gnedigen herren stat von Maidburg, dem man jerlich an sand Michelstag dauon dient zehen wienner phenning vnd nicht mer. Also haben wir es verkaufft vnd ze kauften geben dem erbern mann Chunraten dem Lugrer, seiner hausfrawn vnd irn erben daselbs ze Leutaker vmb ain gellt, des wir von in gantz vnd gar gericht vnd gewert sein ze rechten tegen an all scheden, also, das si den vorgenanten furbas ledikleich vnd freileich schullen haben, nützen vnd nyessen vnd allen iren frumen damit schaffen mit versetzen, verchauffen, geben, wem si wellen, an alle irrung, vnd vertzeihen vns auch des gantz vnd gar vnd schullen vnd mugen auch furbas gen dem egenanten Chunraten dem Lugrer von Leutakker, seiner Hausfraun vnd allen iren erben kain ansprach noch vordrung tun noch gewinnen von des vorgenanten virtail weingarten wegen in dhainerlay weis, weder wenig noch vil, also beschaidenlich, das der vorgenant Chunrat der Lugrer, sein hausfrau vnd all ir erben, oder wer den weingarten inne hat, von dem vorgenanten weingarten alle Jar jerleich in den Osterueirtagen ainen Jartag pei sand Michels kirchen ze Pulka begeen schullen mit sechtzigk wienner phenning vnd nicht mer. Wir sein auch ich obgenanter Niclas vnd all vnser Erben des vorgenanten weingarten ir recht gweren vnd scherm für all ansprach, als purkrechts recht ist vnd des Landes recht ze Osterreich. Wer aber, das in chrieg oder ansprach daran auferstund mit recht, von wem das wer, denselben krieg sullen wir in gentzleich ausrichten vnd allen irn schaden widerkern, den si sein nement mit dem rechten, vnd das sullen si vnd ir erben haben auf vns vnd vnsern erben vnd auf allem vnserm gut vnuerschaidenlich, das wir haben oder hinder vns lassen in dem land ze Osterreich oder wo wir es haben, wir sein lembtig oder tod. Vnd das das furbas stet vnd untzebrochen beleib, dorumb so gib ich obgenanter Niclas vnd all vnser erben dem vorgenanten Chunraten dem Lugrer vnd allen seinen erben den Brief besigelt durch vnserr vleissigen pet willen mit des erbern vnd weisen Hansen von Pergaw, die zeit mitpurger vnd Schuelermaister ze Pulka, anhangundem Insigel, im an schaden, wenn ich obgenanter Niclas aigen Insigel nicht gehabt hab, dorunder ich mich gentzleich verpind, alles das stet ze haben, das oben an dem brief geschriben stet. Geben nach Christi purd virtzehenhundert Jar darnach in dem Czwelften, des freitags nach sand Vrbanstag.

Source Fulltext: HAUSWIRTH, Schotten (=FRA II/18, 1859) S. 524-526