Ich Klaus der Prewss, ich Hans vom Kamp vnd ich Hans der Glockengiesser, diezeit des Rats der Stat zu Wienn, Wir veriechen vnd tun kund offenlichen mit dem brief, daz für den Rat der vorgenanten Stat zu Wienn kom der erber briester Her Berchtold der Awer, zu den zeiten Kaplan sand Pangreczen Kapelln gelegen an der Herczogen Hof zu Wienn, an ainem tail vnd klagt von seines Hauss wegen gelegen daselbs vmb die mawr, die von dem tor seins hofleins, das zu seinem haus gehort, gieng vncz an das eck der Kappellen gegen der Herczogen Hof, daz dieselb maur zu erbrochen, zu errissen vnd pawuellig worden weˆr von wegen Lienhart von Seueld heusel, daz an dieselb maur gepaut wêr, darinn ain Stubel vnd ain grueb gemacht wêr, damit der maur grunt vnderuaren wêr, dauon im der egenant schad auferstanden vnd nicht also von alter herchomen wêr. Daengegen kom an dem andern tail auch für den egenanten Rat der egenant Lienhart von Seueld vnd sprach, daz das stubel vnd die grub sein voruodern in dasselb sein heusel gepaut hieten, dauon maint er, daz er an dem schaden der egenanten maur gar vnschuldig wêr, vnd baten den gantzen Rat vnuerschaidenlich, daz sy in ettlich haus in darauf geben zu beschawern. Des gab der Rat vns vorgenant drey in darauf zu beschawern, vnd haben auch die vorgenanten stuck aigenlichen beschawt vnd vns mit guter kuntschaftvnd gewissen eruarn vnd in ain Recht darnach gesprochen nach rat der zwayr werchmann maister Vlreichen des Warnhouer vnd maister Hermann des Zymermans, dabey sy furbas vor allen krieg beleiben sullen, also, daz der vorgenant Lienhart von Seeueld die egenante maur sol gar nyderlegen vnd sol die hinwider aufpawen vnd machen, als si vormals von alter da gestanden ist, mit seinem gelt an des egenanten Hern Berchtolds scheden, vnd will er denn sein heusel an dieselb maur pessern, pawen oder machen, das sol er auch tun an desselben Hern Berchtolds vnd seines haus vnd maur scheden. Darnach komen wir wider fur den Rat vnd sagten da von der egenanten sach wegen vnser Kuntschaft, als wir ze recht solten. Und daruber zu ainem warn vrchund geben wir von gescheft vnd gehaissen des vorgenanten Rats dem egenanten Hern Berchtolden vnd seinen Nachkomen den brief versigelten mit vnser obgenanten mein Klausen des Prewssen vnd mein Hansen des Glockengiesser baiden anhangunden Insigeln, vnd wan ich vorgenanter Hans vom Kamp selb aigen Insigel nicht hab, so vergich ich der benanten sach vnd er den obgenanten Insigeln von wort ze wort, als vorgeschriben stet. Geben zu Wienn an phincztag nach sand Pauls tag, als er bechert wardt, nach Christi gepurd vierzechenhundert Jar darnach in dem dreyzehenden Jare.

Source Fulltext: HAUSWIRTH, Schotten (=FRA II/18, 1859) S. 529-530