Wir Albrecht von gots gnaden Herczog ze Österreich, ze Steyr, ze Kernden vnd ze Krain, Graf ze Tyrol etc. bekennen, daz fur vns kam vnser getrewr der Erasem der Perntaler vnd pat vns vleizzleich, daz wir im geruchten ze verleihen achczehen huben, gelegen in Aczenpekher pharr vnd in Otnanger vnd zu Vnkhnach, vnd vier vnd vierczig zehenthewser daselbs, wan die sein erb vnd lehen von vns weren. Das haben wir getan vnd haben demselben Perntaler die obgenanten Güter mit iren zugehorungen verlihen vnd leihen auch wissentleich mit dem brief, was wir im ze Recht daran leihen sullen oder mugen, also, daz er vnd sein Erben die nu furbazzer von vns vnd vnsern Erben in lehens weis innhaben, nuczen vnd niessen, als lehens vnd Lands Recht ist, vnguerleich. Mit vrkund dicz briefs. Geben ze Wienn an dem Heiligen Auffarttag, nach Kristi geburd vierczehenhundert Jar darnach in dem Drewczehendem Jare.

Source Fulltext: HAUSWIRTH, Schotten (=FRA II/18, 1859) S. 536