Wir Albrecht von gotes gnaden Herczog ze Österreich, ze Steyr, ze Kernden vnd ze Krain, Graue ze Tyrol etc. bekennen, daz für vns kom der Ersam geistleich vnser lieber andechtiger . . der Abbt dacz den Schotten hie zu Wienn vnd gab vns zu erchennen, wie man ein ewige Messe auf dem Korner der pharrkirichen zu Pulka gestifft vnd bewidmet hiett nach lautt des Stifftbriefs darüber gegeben, darczu er als lehenherr derselben Mess vnd auch der edel vnser lieber getrewer graf Hanns von Maydburg ir gunst vnd willen geben hieten, und bat vns vleissikleich, des auch zu verhengen. Nu haben wir zuvordrest durch gotes vnd merung willen seins dienstes nach des yeczgenanten abbts vleizzige pet zu derselben Stifftung vnser gunst vnd willen gegeben vnd bestetten auch die wissentleich mit dem brief, was wir ze recht daran bestetten sullen oder mugen, und mainen vnd wellen, daz es nu furbazzer dabey genczleich beleibe, als dann die vorberüret Mess gestifft ist, an menicleichs irrung vnd hindernuzz, nach begreiffung des obgenanten Stifftbriefs an geuerd. Mit vrkunt dicz briefs. Geben ze Wienn an Eritag vor des heiligen Krewczs tag Inuencionis, nach Cristi gepurd vierczehenhundert Jar darnach in dem dreyczehentem Jar. D. Dux. in consilio.

Source Fulltext: HAUSWIRTH, Schotten (=FRA II/18, 1859) S. 531-532