Ich Stephan der Missingdorffer vergich für mich vnd all mein erben vnd tuen kund offenleich mit dem brief allen Lewten gegenburtigen vnd chunftigen vmb die nachgeschriben Gült vnd Güter alle. Von erst die Vesten gancz zu dem Heyligenperg, als sy mit aller zugehörung mit alter herchomen ist, vnd zwen pawngerten bey derselben vesten vnd zwayhundert Jeuch Akchers vnd Sechczehen Tagwerich wismats. Item ainen weingarten gelegen bey der Chirichen, des Syben viertail sind. Item Perkchrecht vnd Zehent auf fünf vnd zwainczigk viertailen weingerten gelegen daselbs dacz dem Heyligenperg vnd drew phunt vnd Sechtzig phenning wienner Münzz geltes gelegen daselbs dacz dem Heiligenperg auf behaustem guet, die zu den zeiten die hernach benanten Holden diennt. Des ersten Niclas der Müllner von ainem hof vnd von ainer Mül zwelf schilling. Item Herman von Lewtschestorf von ainem gantzen Lehen ain phunt. Item Bernhart der Pewrl, Michels des Müllner Sun, vnd Stephl von Strayffing yegleicher von ainer hofstat Sechczig phenning. Vnd drew Höltzer, ains gelegen bey der egenanten Vest, das ander bey der Chirichen, daz dritt bey dem Tehemperg vnd haist daz Scharnastal, vnd gantzen Zehent auf Sechs gantzen lehen vnd auf ainem drittail ains Lehens gelegen ze Newsidl, weinczehent vnd Traidczehent, grossen vnd chlainn, ze veld vnd ze dorff. Item die Vischwaid vnd Sechs Jeuch Ekcher gelegen bey dem egenanten holtz Scharnastal, vnd dasselb holtz vnd die Sechs Jeuch Ekcher sind freys Aigen. Item zway phunt wienner phenning geltes gelegen ze Hewczendorf auf ainer Muel vnd ist Aigen. Item ze Greffensultz fünf viertail weingarten vnd daselbs auf ainer hofstat den dienst vnd ist purkchrecht. Item vnd auf purkchrechtekchern in Hipplerveld Syben vnd zwainczigk phenning gelts vnd zway tail zehent auf denselben ekchern. Vnd alles das, daz zu der vorgenanten Vesten vnd zu den obgenanten Gülten vnd Gütern allen geho^eret, vnd mit dem Rechten, als daz Vlreich der Helphant gehabt hat vnd hinder im lassen hat, vnd als daz von alter herchemen ist, erben, geuallen vnd beleiben sol bey der Edln frawn Katrein, Hannsen des Schönnfelder seligen Tochter vnd Jorgen des Sybpekchen eleiche hausfraw, vnd bey allen irn erben vnd allen irn frumen damit ze schaffen mit verchauffen, mit versetzen, geben, machen, schaffen, wem sy wil vnd wie in das allerpest fu^egt vnd wol chumbt, an all mein vnd aller meiner erben Irrung vnd hindernuzz an geuerd. Es sullen auch ich noch all mein erben noch ander yemant von vnsern wegen hintz der obgenanten frawn Kathrein vnd hintz allen irn erben von der vorgenanten Vest, Gült, Zehent vnd Güter wegen dhainen Zuespruch, Vordrung noch Recht nicht haben noch gewynnen an geuerd. Vnd daz die Sach also stet vnd vnczebrochen beleih, darüber so gib ich obgenanter Stephan der Missingdorfer für mich vnd für all mein erben der obgenanten frawn Kathrein, Hannsen des Schönnfelder seligen Tochter vnd Jörgen des Sybpekchen eleiche hausfraw, vnd allen irn erben den brief zu ainer warn vrchund der Sach versigilten mit meinem anhangundem Insigl. Auch hab ich vleizzleich gepeten die Edln mein lieb Vettern Hannsen den Missingdorffer vnd Jörgen den Palterndorffer, daz sy der Sach geczewgen sind mit irn anhangunden Insigeln, in vnd irn erben an schaden. Der brief ist geben nach Kristi gepurd viertzehenhundert Jar darnach in dem viertzehendem Jar, an Montag nach sand Lutzein tag.

Source Fulltext: HAUSWIRTH, Schotten (=FRA II/18, 1859) S. 543-544