Wir Albrecht von gotes gnaden Herczog ze Österreich, ze Steyr, ze Kernden vnd ze Krain, Graue ze Tyrol etc. bekennen, daz für vns kam vnser getrewr Hanns der Floyt vnd bat vns diemüticleich an sein selbs vnd Wolfgangen, weilent Tybolts des Floiten seins Bru^oder Suns, stat, in ze verleihen die nachgenant Gült, zehenten vnd güter vnser lehenschafft, wan die erbleich an sy komen wêren. Das haben wir getan vnd haben in baiden dieselben gült, zehent vnd güter mit iren zugehörungen von gnaden vnd auch von erbschafft wegen verlihen vnd leihen auch wissentlich mit dem brieue, was wir in daran ze recht verleihen sullen oder mugen, also, daz si vnd ir erben, die nu furbasser von vns vnd vnsern erben in lehens weis ynne haben vnd niezzen sullen, als lehens vnd lands recht ist, vngeuerleich. Vnd sind dis die obgemeldten gült, zehent vnd güter. Von ersten zu Obernhawczental dacz vnsrer frawn, was sy güter da habent, an ein achttail. Item zu Wischental zehenthalben schilling gelts. Item zu Weczeltorff den zehent ze veld vnd ze dorff auf fu^emf lehen mynner ains drittails. Item ze Frawndorff zwelif schilling gelts. Item zu Eberstorff bei grossen Russpach auf fümf lehen ganczen zehent ze veld vnd ze dorff. Item zu Obern Streitdorff das haws vnd den Mayrhof vnd was darczu^e gehoret zu veld vnd ze dorff. Item ein viertail Zehents daselbs grozzen vnd klainen ze veld vnd ze dorff. Item zwo Pewnt wisen ze Streitdorff. Item drei Fleischtisch zu Velebrunn. Item zu Wolfsprunn dritthalb phunt gelts mynner Sechs phenning auf behaustem gut. Item daselbs vier phunt mynner Sechczehen phenning gelts auf behaustem gut. Item daselbs Newn phunt gelts auf fümf hölczern und ain phunt gelts auf ainem weinczehent. Item daselbs ain halb phunt gelts vnd fümf phunt gelts auf diensthabern vnd das dorfgericht vnd den wiltpan daselbs. Item zu Pêstorff auf zwelif lehen zehent, weinczehent vnd getraidzehent, grossen vnd klainen, ze veld vnd ze dorff, vnd ein perglehen vnd Sechczehen lehen zehents, weinczehents vnd getraidzehents, grossen vnd klainen, ze veld vnd ze dorff. Item ainen Hof ze Eberstorff bei Grozzen Russpach mit aller zugehörung, vnd daselbs ein viertail auf dem dorfgericht. Item zu Obern Russpach zwai phunt Siben vnd vierczig phenning auf behaustem gut vnd auf v¨berlent, dreissig Jeuchart akchers, ain Hofmarich, zwo wisen, Newn vnd fumfczig Jeuchart akchers an dem pirichtal, vnd ain holcz, alles daselbs gelegen. Item zu Eberstorff zwischen baiden Ruspach ainen hof mit aller seiner zugehörung, mit hölczern, wisen, Ekchern, phenninggült, perkrecht vnd weingerten. Item bei Weykchestorff auf ainem akcher acht phenning gelts. Item zu Nidern Ruspach auf ainem akcher Newn phenning gelts vnd das dorfgericht ze Wurnicz. Mit vrkunt dicz briefs. Geben ze Wienn an sant Gregorientag, anno domini Millesimo Quadringentesimo Decimo Septimo.

Source Fulltext: HAUSWIRTH, Schotten (=FRA II/18, 1859) S. 553-554