Ich Hertneid vnd ich Hainreich, geprüder von Potendorff, bechennen für vns vnd vnser erben vnd tun chund offenlich mit dem brief von wegen der drewczehenthalb Hundert pfundt wienner pfenning, so der Edeln frawn frawn Margarethen von Pösingen, weilent herren Fridreichs von Potendorfvnd yeczund herren Hannsen von Hohemberg Hawsfrawn, vnserr lieben Muomen, von dem erern irem wirtt für Haymstewr vnd Morgengab verschriben sind nach lautt des brieues, der daruber ist, daz wir maynen vnd wellen, daz dieselben drewczehenthalb hundert pfundt phenninge Haymstewr vnd Morgengab auf frawn Wilburgen, Hannsen von Puochaim hausfrawn, der benanten Margarethen tochter, vnser lieben Mu^omen, vnd ir leibserben lediklich geuallen sullen vnd dabey beleiben. Vnd haben ir auch die brief, so v^eber die benanten drewczehenthalb Hundert pfundt Haymstewr vnd Morgengab lautten, v^ebergeben, was wir der inngehabt haben, vnd ob von vns allen unsern erben icht brief herfür chomen, die vber die benanten drewczehenthalb Hundert phundt lauteten, die sullen ir vnd iren leibserben dhainen schaden bringen an geuerd. Vnd des ze vrchunt geben wir vorgenant geprüder von Potendorff der benanten frawn Wilburgen vnd iren Leibserben den brief versigelten mit vnser baider anhangunden Insigeln, vnd zu gezeugnüzz vnder vnsers diener Insigel Hildprantz des Kratzer, den wir darumb haben gepeten, im vnd seinen erben an schaden. Geben an Phincztag nach Pangracii, nach Christi gepurde vierczehen Hundert Jar vnd darnach in dem Sechczehenden Jare.

Source Fulltext: HAUSWIRTH, Schotten (=FRA II/18, 1859) S. 552-553