Martinus episcopus, seruus seruorum dei, dilectis filiis Angelo abbati monasterii in Runa et Leonardo priori domus Throni Marie, Cisterciensis et Cartusiensis ordinum, Salzeburgensis et Patauiensis diocesum, salutem et apostolicam benedictionem. Ad ecclesiarum et monasteriorum omnium statum salubriter dirigendum iuxta pastoralis officii (munus?) intendentes eorum, cum ipsa deformata comperimus, reformacioni apostolice solicitudinis partes solerter adhibemus. Sane pro parte dilecti filii nobilis viri Alberti ducis Austrie nobis nuper exhibita peticio continebat, quod in ducatu Austrie et locis aliis, eius temporali dominio subditis, in plerisque tam virorum quam mulierum sancti Benedicti et sancti Augustini ordinum monasteriis, regulari calcata obseruancia, ordo monasticus diuinumque seruicium prostrata tabescunt, et presidencium aliorumque huiusmodi obseruancie deditorum inibi inordinatis extensis moribus et regimine excessus quam plurimi prodeunt damnabiliter impuniti, ipsa quoque monasteria in capite et membris nec non spiritualibus et temporalibus reformacionis ministerio noscuntur multipliciter indigere. Nos, quorum interest, ne noxia grauiora subintrent, more sublato dispendio congruam in premissis adhibere medelam, eciam dicti ducis in hac parte supplicationibus inclinati ac de uestris probitate et industria plurimum in domino confisi, discretioni uestre per apostolica scripta mandamus, quatinus ad monasteria atque loca huiusmodi personaliter accedentes et spiritus almifici ore fecundati, deum solum pre oculis habentes, duobus saltem uel pluribus moribus et uita comprobatis eorundem ordinum professoribus uobis adiunctis, in monasteriis et locis eisdem circa spiritualia et temporalia nec non in capite et membris debite uisitationis officium instituere et exequi nullatenus proteletis. Nos enim uobis uice nostra monasteria et loca predicta ac illorum quodlibet ipsisque presidentes ac personas eorundem, cuiuscunque status uel conditionis fuerint, prout monasteriis et locis in spiritualibus et temporalibus nec non capite et membris expedire noueritis, reformandi et, quemadmodum presidentibus ac personis eisdem singulis eciam per ipsos commissis compensatis criminibus et excessibus debitum extiterit, corrigendi, ipsosque presidentes et personas iuxta eorundem criminum et excessuum per illos perpetratorum qualitatem et exigenciam, sanctiones quoque canonicas ac dictorum ordinum regularia, constituciones et instituta penis debitis absque personarum delectu percellendi, et a dignitatibus eciam abbacialibus nec non administrationibus et officiis, quibus preesse censentur, penitus remouendi et destituendi, ac eorum loco alios ad hoc utiles et ydoneos inibi surrogandi et preficiendi, ipsisque prefectis curam nec non regimen et administrationem monasteriorum et locorum ac dignitatum, administrationum monasteriorum et officiorum, quibus illos prefeceritis, committendi et ipsis ab eorum subditis obedienciam ac reuerenciam debitas exhiberi faciendi, contradictores quoque et rebelies per censuram ecclesiasticam et queuis alia iuris remedia appellacione postposita compescendi, omnia preterea alia et singula in premissis et circa ea quomodolibet necessaria uel oportuna exequendi, nec non ordinandi et disponendi plenam et liberam concedimus tenore presentium facultatem, inuocato ad hoc, si opus fuerit, auxilio brachii secularis, non obstantibus constitucionibus apostolicis ac statutis et consuetudinibus monasteriorum et ordinum predictorum iuramento, confirmacione apostolica uel quacunque firmitate alia roboratis ceterisque contrariis quibuscunque, seu si aliquibus communiter uel diuisim a sede apostolica sit indultum, quod interdici, suspendi uel excommunicari non possint, per litteras apostolicas non facientes plenam et expressam ac de uerbo ad uerbum de indulto huiusmodi mencionem. Datum Constancie XVI. Kl. Februarii, pontificatus nostri anno primo.

Source Fulltext: HAUSWIRTH, Schotten (=FRA II/18, 1859) S. 559-560