Ich Sigmund ich Reinprecht und ich Albrecht geprueder von Eberstorf vergehen fuer uns und all unser erben und tuen kund offenlich mit dem brief allen leweten yeczund und hernach kuenftigen, daz wier mit guottem willen und wolbedachtem muot zue der czeit, da wier es mit recht wol getuon mochtn und mit unsers gruntherren hannden, des erwierdigen geistlichen herren hern Niclasen abbt dez gotshawss unserr lieben frawen dacz den Schotten ze Wienn, verchauft haben unser haws mitsampt dem Garten daran glegen in der Verberstrass oder in Sand Dorotheen Gassen zu Wienn, ainhalben ze naegst der allten kanczley, anderthalben ze naegst unserm hawes, daz wier noch haben und daz da noch stoest an Hannsen dez Müsstrear haws, do man von demselben haws alle iar dient den geistlichen herren hintz den Schotten zu Wienn fuenfczehn wienner phenning an Sand Michels tag ze gruntdienst und nicht mer. Das vorgenant unser haws, mitsampt dem garten alz oben begriffen ist, haben wir mit allen den nueczen fren und rechten, alz wier es von allter in gruntsrechts gewer inne gehabt und herpracht haben, recht und redlich verchaufft und geben umb hundert und vierczigk phundt wienner phenning der swarczen muennss, der wir gancz und gar verricht und gewert sein, dem edelnn herren hern Hainreichen von Potendorf und allen seinen erben fuerbasser lediklich und freylich ze haben und allen iren fromeen, damit ze schaffen, verkauffen, verseczen, schaffen machen und geben wem sy wellen, und alles das damit tuon und hanndeln daz in aller pesst fuegt und wolgevellt an unser und maeinklichs von unsern wegen hindernuess und irrung und seinen auch wier obgenant geprueder von Eberstorf mitsampt allen uensern erben unverschaidenlich dez vorgenanten hawss mit sampt dem garten als vor gemelt ist dez vorgenanten herren Hainreichs von Potendorf und aller seiner erben recht gewesen und scherm fuer all ansprach alz gruntsrecht und der stat ze Wienn recht ist. Waer aber das in icht chrieg oder zuespruch daran aus erstuenden von wem das waer mit recht waz sy des schaden nement das suellen und wellen wier in gancz ausrichten und widercheren an allen ireen schaden, und suellen auch sie das haben, dacz uns und unsern erben unverschaidenlich und dartzu auf allem dem guet, daz wier haben in dem lannde zue Österreich oder wa wir es haben, wie das genant oder wa es glegen ist, nichts ausgenom, wier seinn lemtig oder tod. Und daz der chauff fuerbazzer also staet und unczebrochen pleib, darueber so geben wier vorgenant geprueder von Eberstorf fuer uens und all unser erben dem egenanten von Potendorf und allen seinen erben den brief versigilten mit unserer vorgenanter geprueder von Eberstorf anhangunden insigeln und mit dez vorgenanten gruntherren gruntinsigl und zue getzeugnuess under dez edelenn unsers lieben vettern hern Hannsens von Eberstorf obristem chameraer in Österreich insigl, den wir darumb fleiss haben gepeten, iem und seinen erben an schaden. Geben zue Wienn an phincztag vor Sand Pauls tag als er ist worden bechert nach Christi gepuerd vierczehnhundert und in dem sybenundzwainczigistem jare.