Ich Hanns der Mairhofer, ich Hanns der Chirichstayger vnd ich Dorothe sein hausvraw vnd ich Kathrey, Chunrats des Moesstel purger cze Waidhofen auf der Tey hausvraw, desselben hannsen Mairhofer paid swesstern vnd mit sampt vns all vnser erbn, gegnwurtig oder chunftig, wir vergehn offenbar mit dem gegenwurtign brief vnd tun chunt allen lewtn, di in ansehent, lesnt oder hornt lesn, Daz wir mit wol bedachten mut, mit gunst vnd willn aller vnsrer erbn, nach weysung vnd rat vnsrer pessten vnd nachstn frewnt, cze der czeit, da wir ez mit recht wol getun machten vnd ez nyemant mit recht widersprechen macht nach widersprach, recht vnd redleich habn verchaufft vnd cze chauffen gegebn vnsern hof, der da haizzt am mairhof in Chalmunczer pharr gelegn mit aller zugehorung, der vnser rechtez purkchret ist gewesn von dem erwirdign Gotshaws cze Sytanstetn dem geistleichen ersamen herren . . . dem Abbt vnd der Samung vnd auch dem selbn Gotshaws cze Sitanstetn vmb ein gellt, des vns wol genuget hat vnd des sew vns schon aller sache cze rechtn taegn gancz vnd gar gericht vnd gewert habnt, denselbn hof gnant am mayrhof mit allen ern, rechten vnd nuczczen, die durch recht dar czu gehornt vnd da von bechommen mugen ze hollcz, ze velld, ze wismad vnd waid vnd cze wazzer, ez sey gestifft oder vngestifft, gepawt oder vngepawt, besuecht oder vnbesuecht, wie daz allez genant ist, in allen den rechten, als wir vnd vnser vorvodern daz allez vnuersprochenlich in nucz vnd in gwer herpracht vnd gehabt habn, hab wir in gegebn auz vnser nucz vnd gwer in ir vnd irs obgenanten Gotshaws cze Sytanstetn nucz vnd gwer, Also beschaidenlich, daz wir vnd all vnser erbn hincz dem vorgenante hof am mairhof vnd aller czugehorung furbaz nymmermer dhainen czuspruch vnd ansprach habn oder gewinnen schullen weder mit recht nach an recht vnd wir verczeihen vns auch des alles vnd tun vns des cze furczicht mit dem brief. Wir schullen auch vnd wellen vmb den eegenanten hof am mayrhof vnd allew czugehorung des vorgenanten erwirdigen geistleichs herren . . . des Abbts vnd des ersamen Conuent vnd auch des Gotshaws cze Sitanstetn recht scherm, gwern vnd fur stand sein fur allen chrieg vnd ansprach an aller stat, wo in des mit recht not vnd durfft geschiecht nach dem Lantsrecht, als solichs chauffes vnd purkchrechts recht ist in dem Land cze Oestereich. Naemen sew dar vber von der gwerschaft wegn ynndert dhainen schaden mit recht, wie der schad genant wurd, den ir ainer auz dem vorgenanten Conuent des klosters cze Sitanstetn pey seinen trewn vnd gewizzen an ayde vor erbern lewtn gesprechen vnd bestaetn mag, denselben schade schull wir in aller sache gancz vnd gar auzrichten, ablegn vnd widerchern an alle widerred vnd sew schulln auch daz alles habn auf vns vnd vnsern trewn vnd dar czu auf aller vnsrer hab, wo wir di habn oder gwinnen inner lants oder auzzer lants, auf wazzer oder auf lant, versuecht oder vnversuecht vnd sew schullen desselbn schaden da von bechommen an chlag un furbot vnd auch an allez rechten mit irs vogts hilf vnd der lantsfursst oder wer seinen gewalt hat, schol in dieselbig vnser hab ingeben vnd in antwurtten, als vil daz sew hauptguts vnd auch der schadn gancz vnd gar gericht vnd gewert werden, also daz das vnser vnd aller vnser erbn gegenwurtiger vnd chunftiger gutleicher willn schol sein an alle irrung, wir sein lebentig oder tod. Daz di red furbas staet vnd vnuerchert beleib, dar vber czu einem sichtigen vrchund der warhait geb wir in den offenn brief versigilt vnd bestett mit vnser vorgenanten Hannsen des Mairhofer vnd Hannsen des Chirichsteyger paider anhangunden jnsigilln, hinder di wir eegenanten Dorothe vnd Kathrey, des selbn Hannsen des mairhofer swesstern, vns mit vnsern trewn an aydes stat verpunden habn an geuar stet cze habn alles, daz oben an dem brief geschribn ist, wann wir aygenew jnsigil nicht habn, der handlung sind auch durch vnsers vleizzigen pets will zu pezzer sycherhait czeugen die erbern Ott der Gansel von Chrenstetn vnd Goerig der Rathayminger, di czeit pfleger dacz sand Peter in der aw vnd Ludweig der Tyeminger mit iren anhangunden jnsigilln in an allen schaden. Der brief ist gebn nach vnsers herren Christi gepurd vber dreyczehen hundert jar im ain vnd achczigisten jar, an des heyligen Ewangelisten sand Luce tag.

Source Fulltext: RAAB, Seitenstetten (=FRA II/33, Wien 1870) S. 298-300