Wir Herman graf ze Cili vnd in dem Seger etc. bekennen, als wir czwischen dem Erwirdigen Abbt Hermann vnd dem Gotshaws ze sand Pauls in dem Lauental an einem tail, vnd den erbern vesten Rittern Purkcharten vnd Wilhalm gebru^oder von Rabenstain an dem andern tail von der Sto^ess vnd missehellung wegen So Si kegen einander haben gehabt ausgesprochen haben, als di Spruchbrief aigenlich lawttend vnd begreiffent di wir den vorgenanten baiden taillen vormallen haben gegeben¹ wie wir czischen In haben ausgesprochen, vnd darinn nemlich begriffen ist vmb di hernach geschriben stukch, die daselbs in dem ersten vnserm Spruch nicht ausgericht worden sein, daz wir selber hinauf in das Lauental komen, oder vnser Ret mit vollem gewalt hinaufschikchen solten die ze beschawen vnd auszerichten, das auch diselben vnser Re^at also aigenlich habent beschawet, vnd dauon sprechen wir aber des ersten: Item von des wu^orens wegen an der Lauent, als Paul der Ramung selig vormallen darumb gesprochen hat, vnd aber darnach der hochgeborn fürst vnser gnediger herr herczog Albrecht von Osterreich etc. seliger gedechtnuss, auch darumb czwischen dem Abbt vnd dem Gotshaws ze sand Pauls vnd Purkcharten vnd Wilhalm von Rabenstain gebru^odern gesprochen hat vnd darnach Si aber dannoch von desselben wu^orens wegen in Stössen vnd in krieg gewesen sind, vnd darumb wir selber auf dasselb wuren geriten vnd das beschawet haben, vnd haben aber darnach vnser Rete vnd gescheft mit vollem gewalt an vnser stat hinauf geschikt, auch dasselb wu^oren ze beschawen vnd auszerichten. Vnd von des wegen so sprechen wir nach vnserm vnd vnserer Rete beschawen, wie der Abbt vnd das Gotshaws vncz auf hewtigen tag gewu^ort haben, vnd wie die wu^or stekchen stend dabei sol ez hinfu^or beleiben, vnd sol der Abbt chainen fu^orslag hinin in die Lauend nicht mer tu^en vnd in daz wasser nicht mer fu^orslahen noch wu^oren. Wer aber daz der fluz vnd daz wasser die alten wu^or, als die wu^orstekken yecz vernahent vnd stend, zebrech oder zebrochen wu^ord, daz mag der Abbt vnd das gotshaws wol vndersteen vnd das we^aren als verren als die wu^orstekken yecz stend, aber hinfur sol er in das wasser nicht fu^orslahen noch wu^oren als oben begriffen ist, vnd waz das wasser baiden taillen griezz antragen oder anschuten wirdet, daz sol yetwederm tail also still ligen vnd beleiben vngewu^ort vnd vngei^erret, als lang vncz ob in das wasser selber wurd von Stat tragen vnd durchbrechen angeue^art. Auch von der Slaiffen wegen vnder Loschental darumb der Abbt vnd die Rabenstainer mit einander in stössen sind, Sprechen wir: als die alte Slaiff darnach man von alter holcz geslaift hat vnd darnach man geet vnd auch viech treibt, vnd als die leen verhabt die daselbs aller nachst an die wisen in den Lebern stössen vnd als der Rain von der Keen vnd nach dem Zeilech derichts ken der Lauend vber stet vnd haltet als daz vnser Ret vermerkt habent di wir zu dem beschawen hinauf gesandt hetten, daz allez waz des oberthalben der lee^an vnd des Rains nach zeilech derichts vncz an die Lauend kegen dem kloster hinauf gelegen ist, dem Abbt vnd dem Gotshaws ze sand Pauls an irrung beleiben sol, vnd waz aber inderthalben der alten Slaiffen des vorgenanten Rains vnd nach dem zeilech derichts vncz an die Lauent gelegen ist, das sol alles den egenanten Rabenstainern vnd irn erben auch an irrung beleiben vnd geuallen. Item vmb den Rain vnder dem hof vnder Loschental gelegen, darumb der Abbt vnd das Gotshaws zu sand Pauls ainen brief habent, wie di vier darumb gesprochen habent, daz in her Chunrat der Huntsdorfer dem Gotshaws zu sand Pauls geben hette fur ainen schaden den er dem Gotshaws mit ainem wu^oren solt getan haben, vnd als auch vnser eegenanter herr herczog Albrecht seliger darumb gesprochen hat, daz er dem Gotshaws beleiben solt, hetten aber di Rabenstainer icht pesser kuntschafft dawider, die solten Si furbringen. Nu habent vns die Rabenstainer elter vnd Junger brief furbracht, darczu haben Si vnd ir erben desselben Rains wol Sechs vnd new^anczikch Jar nucz vnd gewer gesessen vnd herbracht, vnd darumb sprechen wir: Seind di Rabenstainer den Rain so lang in nucz vnd gewer herbracht haben, daz Si hinfu^or noch dabei beleiben sullen. Item wir sprechen auch vmb den Widembach,² vmb den Akker bei sand Johanns gelegen vnd vmb den weg durch den Garten, darumb der Abbt vnd das Gotshaws zu sand Pauls mit den Rabenstainern in stossen sind, vnd darumb wir noch nicht czwischen In ausgesprochen haben, daz wir selber dahin komen, oder vnser Rete mit vollem gewalt an vnserr stat dahin schikken wellen hic czwischen vncz auf phingsten schierist kunftig, dieselben vorgenanten drew stuckch ze beschawen vnd auszerichten, vnd wie wir oder vnser Rete die dan beschawen, vinden vnd ausrichten werden, darumb sullen vnd wellen wir auch vnsern brief geben, damit sich denn yetweder tail seiner rechten nach vnser ausrichtung hinfur darinn wisse ze halten. Mit vrkund des briefs versigelt mit vnserm anhangenden Insigel.

Source Fulltext: SCHROLL, Urkundenbuch St. Paul (= FRA II/39, Wien 1876) S. 294-297