Uns hat der ersam geistleich unser lieber andechtiger der probst zu Voraw jez anbracht, wie ettleich seins convents brüeder an sein und seins techans Urlaub wissen und willen aus seinen kloster daselbb zu Voraw gegangen sein, darum seinen oder im und demselben seinen gottshaus smach und unerr aufersteen mochten, das er sich beswert bedanket und uns auch nicht gevallet. Empfelchen wir ew ernstlich und wellen, ob die selben conventt brüeder oder ir einer zu ew komen und begeren wurden, das ir sy bey ew enthalten sollet, das ir dan das nicht tut, sunder wo derselbprobst, der techantt oder ir anwaltt dem sy des bevelchen aufsy zeigen und ew darumb anlangen werden, das ir in oder dem selben irem anwalt die oder denselben an widerred und auszug als dan anverziechen zu desselben brobsts hannden anntwurttet oder ze antwurten bestellet.