O. dei Gracia Dux Austrie et Stirie et Marchio Moravie Omnibus Mutariis et Judicibus suis juxta danubium constitutis graciam suam et bonam uoluntatem. Noueritis, nos priuilegia fratrum in Wilheringen a Friderico quondam Duce Austrie pie memorie nostro antecessore donata perspexisse et tenorem subnotatum in eis inuenisse. F. dei Gracia Dux Austrie et Stirie, Dominus Carniole Omnibus Mutariis et Judicibus suis juxta Danubium constitutis Graciam suam et omne bonum. Cum iuxta solitam progenitorum nostrorum pietatem honorare debeamus ecclesias et ecclesiasticas personas, in quarum honore deus honoratur, Specialiter tamen dilectorum nostrorum Abbatis et Conuentus in Wilheringen immunitatem et libertatem ipsis a progenitoribus nostris et a nobis indultam imminuere nolumus sed augere. Qua re fidelitati uestre mandamus sub obtentu gracie nostre precipientes, quatinus graciam, quam ex nostra concessione cum immunitate hactenus habuerunt, conseruetis predictis fratribus inconcussam Ita, quod in ducendis victualibus vel aliis rebus propriis ad usus ipsorum pertinentibus tam in terris quam in aquis, in ascensu et descensu ab eis nichil penitus exigatis. Preterea talentum Salis maioris ligaminis sev ponderis transducendi semel in anno sine omni muta eisdem liberam concessimus facultatem, prouisuri diligentius, ut illa ecclesia nunc et inposterum sic gaudeat de indulta sibi gracia, ut nos propter hoc apud deum digna percipere possimus premia meritorum. Nos vero proprie saluti providentes et meritorum dei seruos promouentium participes effici cupientes predictam graciam eisdem indulgemus et Sigilli nostri robore confirmamus mandantes uobis ac districte precipientes, ut premissam eis donationem inviolabiliter obseruetis. Datum jn Lynza Anno Domini Mill. CC. LII. Quarto Calendas Decembris.

Source Fulltext: OÖUB 3 (Wien 1862) S. 187-188, Nr. 195