In dem Namen Gotes Amen. Wir Elspet von Gotes Genaden Romisch Chu^enigine tuen chunt allen, di disen Prief lesent oder ho^erent lesen, di nu sint oder hernach chinftig werdent, Daz wir unser Gescheft getan haben mit gueter Fu^erbedechtigait zu der Zeit, da wir iz wol getun mochten, do wir bei gueten Su^ennen gewesen sein, als hernach geschriben steet. Des ersten so schaffe wir und orden, daz, wanne Got u^eber uns gebeut, daz man uns danne begraben schole datz den minnern Prudern ze Wienne in Sant Ludweiges Chapellen, di wir gepaun haben, do wir hin erwelen zeligen von besunder Lieb und Andacht, die wir dar zue haben. Wir schaffen auch den Vrauen datz Sant Claren zu Wienne vierhundert Marchk Silbers Wienner Gewichtes, der sol man hundert Marchk nemen von unser Morgengab und dreu hundert Marchk von unsern Silber Vazzen und swas des gebreste, daz sol man erfu^ellen von unsern guldein Chlainoten. Wir wollen auch, daz die vorgenanten Vrauen umb die vierhundert Marchk Gu^elt kauffen und dieselben Gu^elt di sol man dienen auf Sant Ludweiges Chapellen als lang, vncz si gar berait werde an Maur, an Dache und an Glesern furbaz, so sol man der halben Gu^elt alle Jar vierzk phunt Phenning Wiener Mu^entz geben den Minnern Pru^edern an derselben stat ze Wienne, da wir ligen, zu dem gewant, do man si von chlaiden sol, und zwai phunt denselben Pru^edern an Sant Ludweiges Tag umb ain Mal und zwai phunt umb ain Mal, wanne unser Jar Tag ist, und zwai phunt umb zwai ewige Liecht, di Tag und Nacht prinnen ainez vor Sant Ludweiges Altar und ainez ob unserm Grab. Wir wellen auch, daz di vorgenanten Vrauen alle Jahr geben vier phunt, domit man pezzer di Gleser an unser Chapellen und waz anders daran zepezzern ist, waz u^eber wirt u^eber daz, daz hievor geschaft ist, daz schullen die dichk genanten Vrauen von Sant Claren zu irem Nutzen cheren, das (sic) GOt für uns biten und unsern Jar Tag begeen, und daz si di Pu^erde mit den Pru^edern dester paz mu^egen getragen. Wir wollen auch, ob der Gu^elt icht wurd abgeent von teuren Jaren, daz daz abgee den Vrauen und nicht den Pru^edern. Wir wollen auch, dass die Pru^eder noch di Schwester chain Gewalt haben des Gu^eltes verchauffen, oder in chainer Weiss verwandelen, domit versaumet mecht werden, daz wir geschaffet haben.||
Wir schaffen auch den Vrauen Sant Claren Orden ze Chunigesveld hundert Marchk, die man nemen schol von unser Margengab, und darzue unser guldein Schapel, daz wir prachten von Arragoni, daz do wigt drei Marchk Golt und zwai Lot, daz si haben ain ewigen Priester Minner Pru^eder Ordens an derselben Stat, der Got fu^er uns bit und daz si unsern Jahrtag begeen, Wir schaffen hintz Maurbach hundert Marchk, die man nemen schol von unser Margengab, daz si haben zwen ewige Priester ires Ordens an derselben stat, auch unsern Jahrtag begeen. Wir schaffen auch vierhundert Marchk, di man nemen sol von unser gu^eldein Chlainoten, di man tailen sol, als hernach geschriben stet. Wir schaffen den Predigern ze Wienne ocht phunt, Den Augustinern an derselben Stat dreu phunt, Den Schotten dreu phunt, Den Vrauen hintz Sant Marien Magdalenen zwai phunt, Hintz der Himmelporten zwai phunt, Hintz Sant Laurencen den Predigerinnen zwai phunt, Den Frauen hintz Sant Jacob zwai phunt, Den Frauen hintz Sant Nycla in der Stat zwai phunt, Hintz Sant Nycla vor der Statt zwai phunt, Hintz der Purger Spital! zwai phunt, Hintz dem Spitall ze dem heiligen Geist zwai phunt, Hintz Sant Johanns den sundern Siehen ain phunt. Hintz dem Chlagbaum den sundern Siehen ain phunt. Hintz Sant Lazers ain phunt, Hintz der Pfarre datz Sant Stephan fu^enff phunt, die man tailen sol under di Priester, daz sie Gott biten umb unsr Sel, Hintz Sant Michel dreu phunt, di man auch tailn sol vnder di Priester, daz si Got fu^er vns biten, Hintz Lambach Swartzen Mu^enichen zwai phunt, Hintz Wilhering dem Graben Chloster zwai phunt, Den Minnern Pru^edern ze Lintz dreu phunt, Dem Spital daselben ain phunt, Hintz Chremsmu^enster dreu phunt, Hintz Wels Minnern Priedern drey phunt. Dem Spital ain phunt, Hintz ze Gersten ain phunt, Dem Spital datz Steyr zwai phunt, Hintz Gleunichk bei Steyr zwai phunt, Hintz Sant Florian dreu phunt, Hintz Enns Minnern Pru^eedern dreu phunt, Dem Spital ain phunt, Hintz Erlach den Vrauen dreu phunt. Hintz Seitensteten dreu phunt, Hintz Waidhouen dem Spital ain phunt, Hintz Walthausen zwai phunt, Hintz Ybs den Vrauen zwai phuat, Dem Spital ain phunt, Ze Paumgartenberg dreu phunt, Hintz Zwetel vier phunt, Hintz Sant Pernharten zwai phunt, Hintz Melchk dreu phunt, Hintz Sant Polten dreu phunt, Hintz Sant Andre zwai phunt, Hintz Hertzogenburch zwai phunt, Hintz dem Chotweich dreu phunt, daselbs den Vrauen zwai phunt, Hintz Altenburch zwai phunt, Hintz Tyernstain den Vrauen Sant Claren Ordens dreu phunt, Hintz Stain den Minnern Pru^eedern yier phunt, Hintz Chrems den Predigern vier phunt, Dem Spital zwai phunt, Hintz Minnepach zwai phunt. Hintz Tuln den Predigerinne vier phunt und den Predigern zwai phunt, den Minnern Pru^edern dreu phunt, Dem Spital ain phunt, Hintz La den Pru^edern dreu phunt, dem Spital ain phunt, Hintz Velsperch den Pru^edern dreu phunt, dem Spital ain phunt, Hintz Retz den Predigern zwai phunt, Hintz dem heiligen Chreutz fu^enff phunt umb ein Mal, daz man in geben sol an dem Tag, swen si unser Piuild begeent, Hintz Lienveld vier phunt, auch umb ain Mal, daz man in geben schol, swen si unser Piuild begeent, Hintz der Neunstat Mu^endern Pru^edern drei phunt, den Predigern drei phunt und den Predigerinnen zwai phunt, dem Spital ain phunt, Hintz Haimburch den Pru^edem drei phunt, dem Spital ain phunt, Ze Neunburch enhalb Tuemauer dem Spital ain phunt, Ze Neunburch dem Chloster acht Marchk Wienner Gewichtes umb ein gantzes gerbe. Den Vrauen an derselben Stat zwai phunt den Vrauen Hintz Sant Jacob doselben ain phunt, Hintz Sant Marien-Celle siben March ze pezzern, ob si chain Schaden von uns und von unserm Gesind Gastunge haben. Hintz Marchekke den Augustinern ain phunt, Hintz Prukke den Augustinern ain phunt, datz Prukke in Steyrlant den Mu^enern Priedern dreu phunt, dem Spital ain phunt, Hintz Gretz in Steyrlant der Pharre dreu phunt, Mu^enern Pru^edem dreu phunt, den Predigerinnen zwai phunt, Dem Spital ain phunt, Hintz Rein vier phunt, Den Reglern ze Steutz zwai phunt, Hintz Varawe zwai phunt, Hintz Martpurch Minnern Pru^edern dreu phunt, dem Spital ain phunt, Den Seitsern, die zwischen Martburch und Pettau sitzent, dreu phunt, Hintz Pettau den Minern Pru^edem dreu phunt, den Predigern dreu phunt, dem Spital ain phunt. Hintz Studenicz den Predigerinen zwai phunt, Den Predingerinnen hintz Mermberch zwai phunt, Hintz Minchendorff Sant Claren Orden zwai phunt, Hintz Cili den Mindern Pru^edern drei phunt, Hintz Laybach den Minnern Pru^edem drei phunt, den Augustinern zwai phunt, dem Spital ain phunt. Hintz Leuben den Predingern vier ||
phunt, dem Spital ain phunt, Hintz Judenburch Minnern Pru^edern drei phunt, den Vrauen Sant Claren Ordens zwai phunt, Hintz Wolffsperch Minnern Priedern dreu phunt, dem Spital ain phunt, Hintz Villach Minnern Pru^edern drei phunt, dem Spital ain phunt, Hintz Loentze den Predigerinne ain phunt, Hintz Yniching den Predigerinn ain phunt, Hintz Prichsen den Vrauen Sant Claren Ordens zwai phunt, Hintz Potzen Mu^enern Pru^edern drey phunt. Darnach so schaffe Wir sibentzig Marchk Wiener Gewichtes under di Chlostre, die umb Ravelspurch ligent, den auch von Uns Schade geschehen ist, di man tailen sol nach Unsre lieben Swester Rat Vrauen Agnesen weilent Chu^enigin ze Ungern, der Wir iz emphelichen hintz iren Treuen. Wir schaffen auch hintz Diezzenhouen den Predigerinn fu^enf Marchk, Hintz dem Paradise den Vrauen Sant Claren Ordens fu\enff Marchk, Hintz Schaffehausen swartzen Mu\enichen fu\enff Marchk umb ain Gerbe, An derselben Stat hintz Sant Agnesen den schwartzen Nonnen zwo Marchk, In derselben Stat Mu\enern Pru\edern drey Marchk, Hintz To^ezze den Predigerinn zwo Marchk, und Swester Elsbeten des Chu\eniges Tochter von Ungern, di in demselben Chloster ist, fu\enff Marchk. Wir schaffen auch Unserm Peichtiger zwaintzigk Marchk und seinen Gesellen ocht Marchk. Auch schaffen Wir unserm notigen Gesind vierzk Marichk Silbers. Wir schaffen auch unser treuen Diennerinn Ellen von Potenstain, zwainzik Marchk Geltes, di Wir gelöst haben von unserm Ohem Graf Otten von Ortenburch, die da ligent in dem Enstal in dem Urbar ze Noppenperg in der Tulnich. So bit Wir Unsern lieben Herren und Wiert Chu\enichk Fridreichen, waz des gebrest, daz er daz erfu\elle und enphelichen Im auch hintz sein Treuen Unser Gesind und Unser Junchvrauen, di noch nicht beraten sint. Ditz Gescheft allez, daz hie vor geschriben ist, daz emphelich Wir allez sampt Unserm lieben treuen Herrn und Wiert dem vorgenanten Chu\enichk Friderichen hintz seinen Treuen, und bitten In durch der Treuen willen, der er Uns gebunden ist, und wand Wir Im auf sein Trewe emphelichen sein, daz er daran gedench und daz vor verschriben Gescheft, als Wir iz aus sein Genad geschaft haben, ze Trost unser sel gentzleich und gar und schier volfu\ere, als Wir Im des getraun. Datz ditz Gescheft stet und unzebrochen beleib, darüber so geben Wir disen Prief zu ainem waren Gezeug diser Sache versigelten mit Unsern grozzen Insigel. Diser Prief ist auch gegeben, do von Christes Geburd ergangen worden dreuzehenhundert Jar, in dem acht und zwainzkistem Jar, darnach an Sant Georij Tag.

Source Fulltext: OÖUB 5 (Wien 1868) S. 509-513, Nr. 511