Wir Ott vnd Pernhart prvder von Liechtenwinchel verjehen mit disem prief vnd tu^en chunt allen den, di in sechent, ho^erent oder lesent, daz wir mit vereintem gvtlichen willen verhaizzen vnd gelobt haben mit vnsern trewen dem Erwaern herren Abt Heinrich von Wilhering vnd der Samnung da selben, daz wir in vor Sand Michels tag, der schirst chvmt, auz richtick machen Einen prief von vnserm genaedigen Herren dem pischof von Pazzaw vmb ein awe vnd Acker gelegen ze Tratwerde, daz di fvrbaz ir rechtes freyes aigen svln wesen an allen chrieg mit sampt der Hub ze Tratwerde, di in vnser vater, dem Got genade, verschuf ze Selgeraet. Wer aber, daz wir siv dez priefes nicht richten in der e genanten frist, so habent si vollen gewalt vnser ainen monen ze laisten, swelichen si wellen, vnd sol in der einen erwarn chnecht mit einem phaerit in div laistung legen ze Euerding in ein offen gasthaus, swo si in hin gebietent, vnd sol in der laisten als laistens recht ist, vn nimmer auz chomen, vntz wir siv dez vor genanten priefes richten vnd weren an aller ir schaden vnd svln wir bede pru^eder di laistung geleich tragen. Daz in daz also stat vnd vnzebrochen beleib, daz Ivb wir in mit vnsern trewen, vnd dar vber ze vrchunde der warhait geben wir in disen offen prief versigelten mit vnser baider jnsygel. Der sach sint gezug Her Hertweich von Strachen, Her Wernhard von Rotenfels, her Sickher von Grub, Her Alber von Portzheim, Vlrich Geltinger, Marquart Rvemunt, Christan Alhartinger vnd ander Erwaer laevt genuch. Der prief ist gegeben ze Euerding Nach Christus geburt Dreutzehen Hundert jar, da nach in dem Acht vnd zwainzigistem jar an sand Jacobs Tag.

Source Fulltext: OÖUB 5 (Wien 1868) S. 522, Nr. 521