Ich walther der Satloer Purger ze Lintz vnd mein housfrow Elspet vnd all vnser erben wir veriehen vnd tun chunt allen den, di disen brief sehent oder horent lesen, di nu lebent oder noch chvnftig sind, Daz wir redleich vnd reht mit gutem willen vnd mit wol verdachtem mu^et ze chauffen haben gegeben den erbern herren ze wilhering ain metzen gestrichens Semelmelibs auf vnserm Hous ze Lintz, das gelegen ist niderhalb der Choempinn, mit samt dem Pachhous in der gazzen vnd schullen wir oder vnser nachchomen in den dienen vnd geben an vnser vrown Tag zder dienst zeit in dem heribst alle jar ewichleichen an allen chrieg. waer aber, daz wir oder vnser nachchomen daz versaezzen virtzehen tag nach dem egenanten tag, so sei wier in veruallen mit gu^etleichem willen ze wandel Sechtzich winnaer phenning, vnd ist aber, daz wier oder vnser nachchomen nach dem ersten wandel den dinst wider viertzehen tag versaezzen, so sein wier in aber vervallen ze wandel Sechtzich winnaer phenning. vnd ist aber, daz wir oder vnser nachchomen den oft genanten dienst zvm dritten stund versaezzen viertzehen tag vnd dem Gu^ester hintz wilhering nicht geben, so sein wier vnd all vnser nachchomen in vervallen mit allen den Punten vnd wandeln, di nach der Stat reht ze Lintz auf Purchreht gehorent vnd herchomen sind, Also, daz der Mathe der Poeschingoer vnd sein Housfrow gedraut vnd ir erben, di sev mit ein ander habent, vorganch schullen haben an alles gevaer ain. phunt winnaer phenning Purchreht geltz mit den wandeln auf dem oft genanten hous. Daz di red staet vnd vnzebrochen beleib, Dar vber geb wier disen brief gesigelten mit der Stat jnsigel ze Lintz. Der brief ist gegeben Nach Christes gepu^erd Dreutzehen Hvndert jar, dar nach in dem Nevn vnd zwainzigisten jar An sand Marchs Tag.

Source Fulltext: OÖUB 5 (Wien 1868) S. 541-542, Nr. 542