Ich Ott vnd Pernhart prvder von Liechtenwinchel verjehen fvr vns vnd vnser Erben vnd tu^en chunt allen den, di disen prief sechent, ho^erent oder lesen, Daz alle di Chrieg, di wir haben gehabt gein den erwaern Herren von wilhering vmb di Hub ze Dratwerde vnd vmb di Hub ze vinchenhaim vnd vmb alles daz, daz zu den selben zwain Hu^eben geho^ert besucht vnd vnbesucht, ze Holtz oder ze velde, di siv an gevallen sint von vnsers lieben vater tot, dem Got genade, friuntlich vnd Lieblich haben vericht nach vnser baider friunt rat mit der beschaidenhait, daz wir noch dehain vnser Erib fvrbaz weder gein den Herren noch gein den Guten nicht mer ze sprechen haben vnd sein auch wir mit sampt vnsern Erben der e genanten Gůt vnd alles dez, daz dar zu geho^ert, ir Gewer in allem dem rechten, als siv vnser vater in lazzen hat, als landes recht ist, waer auch, daz den Herren von wilhering von vns oder von vnsern wegen ein chrieg auf erstvnde gein den e genanten Guten, den selben chrieg svln wir in auzrichtich machen an ir schaden, daz in daz also staet vnd vnzebrochen beleib, daz loben wir in mit vnsern trewen vnd geben in dar vber disen offen prief ze vrchvnde mit vnser baider jnsygel versygelten. Der Sach sint geziug her wernhart von Rotenfels, her Leutolt von Chyrichperch, her Alber von Portzhaim, Otacher der fvrtcer, Diether von Aschach, vlrich von Gelting, Meinhart Truchscetze vnd ander erwaer laevt genuch. Der prief ist gegeben ze Euerding nach Christus Geburt dreutzehen hundert jar, da nach in dem Acht vnd zwainzigistem jar An Sand Andres tag.

Source Fulltext: OÖUB 5 (Wien 1868) S. 528-529, Nr. 527