Ich Wernhart vnd Andre bru^eder von Choetzing vnd ich Thoman Otteins Su^en von Choetzing vnd ich Georige der Lainoer mit sampt meiner Housvro^ewn ver Ann vnd ich Heinreich der Swartz, wier veriehen offenbar an disem brief allen den, die in sehent oder horent lesen, Daz wier mit wol verdachtem mu^et vnd gu^etem willen vnd gunst aller vnserr vrevnt vnd Erben vnsrev Gu^et, aines ze Ternpach bei Chv^ernberch, do der Phlu^egel ouf gesezzen ist, vnd aines ze Roewtt, die paidev geacht sind hintz zwain phunten geltes, dem Erbaern Herren Abpt Hermann vnd dem Gotshou^es ze Wilhering recht vnd redleich geben vnd verchauffet haben vmb drew^e vnd Viertzich phvnt alter wienner phenning, der wier gantz vnd gar gericht vnd gewert sein, vnd haben in die auch ouf gegeben mit rechter fu^ertzicht Also beschaidenlichen, daz die selben zway gu^et, Als sev vorgeschriben sind, daz Gotshou^es ze Wilhering besitzen vnd inne haben scho^el in rechter Aygens gewer ledichlichen besu^echt vnd vnbesu^echt an allen chrieg. Wier lo^eben auch an disem brief, daz wier v^enuerschaidenlich, samp wier vo^er benant sein mit vnsern Housvrowen vnd chinden vnd auch Erben der vorgenanten gu^et ze Ternpach vnd ze Raew^et des Chlosters vnd der Sampnung ze Wilhering Herren vnd gewer schullen sein noch landes recht ze Ho^ef vnd ze taiding, wo vnd wenn si des bedürften, an alle ier mu^ee vnd chost gan allen den, die sev vmb die oftgenanten Gu^et ansprechund wu^erden. Waer aber, daz sev iemant dar vmb spraeche an also, daz si vmb eegeschriben gu^et indert ze schaden vnd ze arbaitt chaemen, den selben schaden schulle wier in gantz vnd gar ab legen vnd schullen sev daz haben vnuerschaidenlichen ouf allem dem Gu^et, daz wier haben in dem Land ze O^esterrich, wo daz gelegen sey. Daz der chauff vnd die Red also gantz staet vnd vnzebrochen beleib, dar vber geben wier vorgenanten den Herren vnd dem Gotshous ze Wilhering ze einem v^erchund disen brief versigelten mit meinem Wernhartes des Chaetzinger Insigel vnd verpint ich mich Andre sein bru^eder vnder dem selben, wand ich nicht aygens jnsigels en han, vnd mit Thomans des Chaetzinger, Georigen des Lainaer vnd Heinreichs des Swartzen jnsigeln. Der brief ist geben, do man zalt von Christes gepu^erd Dreutzehen Hundert jar, dar noch in dem Sechs vnd Viertzigistem jar an dem Pericht tag.

Source Fulltext: OÖUB 6 (Wien 1972) S. 534f., Nr. 529