Ich Steffan Porczmair zu Schonhering bekenn fur mich und anstat Clementn, meins lieben brueder, der noch/ clain und ungevogt ist, dafur ich mich incraft des briefs gewalts angenomen hab, und fur all unser eriben und miteriben/ offennlich mit dem brief, wo der zusehen, horen oder lesen furkumbt, das ich wolbedachtlich mit guter vernuft zu der/ zeit, do ich das wolgethun hab mugen, keuflich verkauft und zu statem ewigem kauff und furczicht zu kauffen geben/ hab mein und meins gemelten brueder ackher und dy aw mit aller irer zugehorungen, gelegen zu Obernperckhaim/ ze nagst des Kh[ren]mair ackher, und dy aw ist gelegen ze nagst des mans von Stetten aw: auch unser ackher/ und unsern [anger] der stost an denselben ackher und auch nichtz davon ausgenomen und ist gelegen zu Perckhaim/ in dem Nidern Velt zenagst des Khrenmair ackher und ist als zu lehen von dem erwirdigen goczhaws ze Wilhe-/ ring und davon man dient dem benanten goczhaus alle jar jerlich zu unser frawen tag ze dienstzeit vierczigk/ wienner phenig und nichtmer, dem erbern weysen Walthasar Alckhofer, inwonner zu Lynncz und allen seinen/ eriben umb ain sum gellts, der ich von iem berait zurechter zeit an allen abgang und schaden gantz und gar entricht/ und bezallt pin, daran mich yecz und furan wolbenugt; ich hab auch iem und all seinn eriben die vorgestimbten ackher,/ aw und anger mit allen eeren, rechten und nuczen, wie von allter her darzue gehort und herkomen, auch all/ brief daruber lautund und ich innegehabt zu statem ewigem kauff und furczicht ubergeben, abtretten, ingeant-/ wort mit lehen und gruntherrens handt und insigel bestatt und aller stat, der sie durch recht daruber bedurffent/ aus mein, meins brueder, aller unser eriben und miteriben in des mergedachten Walthasar Alckhofer und aller/ seiner eriben gewalt, nuts und gewer, also das sy nw furbaser wol allen iren nuts und frumen damit trachten inn-/ haben, nuczen, niessen, hanndeln, thun und lassen, versetzen, verkauffen, schaffen machen und geben sullen und mugen,/ wie und wann sew verlust wellent und gutbedunckt an mein, meins brueder, aller unser eriben und miteriben auch ma-/ niclichs von unsern wegen irrung, einred und widersprechen; wann ich des alles fur mich, Clementen meinen/ bruder und fur all unser eriben und miteriben mit und in craft des briefs gants und gar verczigen sein wellen; ich obge-/ nannter Steffan Porczmair secz mich und fur meinen brueder, all unser eriben und miteriben des mergestimbten Walthasar/ Alckhofer und aller seiner eriben der ackher, aw, anger und des kaufs zu rechten gewern und furstant fur all rechtlich/ ansprach, wo und wann des zurecht nottuet, alsdann kaufs belehenter und dinstperr gruntt landes ob der Enns und/ des erwirdigen goczhaus Wilhering recht ist. Gieng in aber an disem kauff und gewerschaft icht ab, oder das in ainich-/ erlay krieg infell oder zwitrecht darinn auferstuende von wem das wer oder wie sich das alles mit dem rechten/ fuegte, des sy zu schaden khamen, wie der genant wurde ungeverlich, kainen schaden ausgenomen, denselben abgang,/ schaden, kauff und gewerschaft geloben wir in in craft des briefs an all ir mue und abgang berait wider ze keren,/ zuerstatten und richtig ze machen; sy mugen auch das alles hincz mir, meinem brueder, allen unsren eriben und mit-/ eriben, darzue auf und von aller unser hab, erb und gu/ot anligund und varund nichtz ausgenomen haben, suechen/ und bekomen, mitrecht innhaben, nuczen und niessen unczt sy abganng, schaden, kauff und gewerschaft davon an/ abslag gar entricht sein, des in ain yeder herr darhinder unser gut ligt und sy darauf zaigen verholffen sein sol,/ wann sy auf craft dicz briefs dahin alle rechten, wo der brief furpracht und verlesen wirt gar erlangt behabt/ und wir gantz ungerecht und verloren habm urkunde dicz briefs besigelt mit des erwirdigen ingot und geistlichen/ herren herrn Thoman abbt zu Wilhering, meins genadigen herrn clain anhangunden insigel, darumben ich/ sein genad mit meinem verferttigten petbrief iem gegeben vleissig gepeten hab, doch seinen genaden, seinen/ nachkomen und insigel an schaden, auch dem erwirdigen goczhaus Wilhering an seiner lehenschaft, gult, vordrung/ und rechten unvergriffenlich und unengolten; under das insigl ich mich und fur meinen brueder, all unser eriben und/ miteriben mit meinen trewen aidesweis verpinde stat zuhallten, volfuren und ingedenck zusein, innhalt des briefs./ Zeugen gebetz umb insigl und verferttigung des petbriefs sind gewesen der ersam herr Wolfgang Aichinger,/ pfarrer zu Schonhering, Jorg Klausner zu Straß, Sigmund Oftheringer, kamrer zu Wilhering und ander/ leut mer. Geben montags vor sand Anthonien tag des heiligen abbt nach cristi geburd vierczehenhundert/ und vierundnewnczigisten jaren.