Ich Lasla Prager, erbmarschalh in Kerntn etc. beken fur mich und all mein erbn offnlich mit dem brief, das fur mich komen ist der erber Hans/ Spieglperger mit ainen offn besigltn erbbrieff lautund auf ain vierdn taill des hofs zw Spieglperg in Swanser pfarr gelegen, das selb/ virtaill des hoffs nun an mich als gruntherrn komen war und batt mich in den selben erbbrieff von newn in der aller pestn form und/ mass, wie es in den selbn erbbrieff klarlich begriffn war confirmiern und bestattn solde, das ich aus phlicht und warn wissen gethan hab/ in krafft dits briefs, also das er und sein erbn das bestimbt viertaill an den bemeltn hoff, seiner zwgehorung furon in haben, nutzn/ und niessen sullen und mugen, auch alln irn notdurfftn und mir oder mein erbn jarlich davon raichn und dien sulln zw unser frawen/ tag der dinst zeit sechtzigkh alter wienner pfenig und nicht mer; ob sy uns den bemeltn dinst und vordrung nit zw rechter/ weill und zeit, wie obn begriffn ausrichtetn oder bezaltn, so ist mir oder mein erbn das beruert ir erbrecht des benantn viertaill/ des Spieglhoffs gantz ledigklich und frey haym gefalln. Ich oder mein sullen und mugen auch als dan damit handln und thuen,/ wie uns verlust an des benantn Hansn Spieglperger und aller seiner erbn und manigklichs von irn wegn irrung und wider-/ sprechn. Sy sullen auch das benant viertaill des Spieglhofs an alln endn stifftlich und pewlich haldn, damit wir unsers/ dinst und vodrung jarlich davon wolbekomen mugen, auch und damit als ander unser behawst hold in albeg trew und gehor-/ sam sein, wan sy dy bemelt ir gerechtigkait auff bemeltn viertaill des hofs ainen andern versetzn, verkauffn, geben oder vermachen/ wellen, wie sich das begab, das sol albeg mit unsern willen bescheen, und lewtn, dy mir oder mein erbn dar zw gefalln und tewglich/ sein. Ich vorbenanter Lasla Prager und all mein erbn sulln und welln auch darumb ir recht gewer und furstant sein fur all rech-/ tlich ansprach, wo und als offt in des rechtlich not beschiecht, als dan solhs erbrechts in land Osterreich ob der Ens gewonhait/ und recht ist trewlich angevarde: mit urkund dits briefs besiglt mit meinen aign anhangundn insigl, darunder ich mich/ und all mein erbn verpind, inhalt dits briefs war und stat zehaldn. Geben montags nach letare [in der vastn] do man/ zalt nach cristi gepurd vierzechnhundert und in vierundnewnziggistn jarnn.