Ich Lasslaw Prager, erbmarschallich in Kherndten bekhenn fur mich und all mein erbn und tuen khundt/ offenlich mit dem brief allen, den er furkhumbt, das ich recht und redlich zw ebigen khawff zw khawffen/ geben hab dem erwirdign und geistlichn herrn, herrn Thoman, abbtt zw Wilhering, dem ganntzen convent/ daselbs und allen irn nachkhomen mein guett genant am Spieglperig mit grunt und podem, aller seiner/ zwgehorung, davon man jarlich zw unser lieben frawentag der dinstzeit ain pfunt pfening lanndes ob der/ Enns werung diennt, ist freis aigen, gelegen in Swaner pfarr, umb ain swma geltz, daran mich yez und/ hinfur wolbenuegt und der ich von in zurechten tagn an allen schaden entricht und bezalt bin worden; darauf hab/ ich dem benannten herren Thoman, abbt zw Wilhering, dem convent daselbs das obemelt guet eing[e]-/ antburt aus mein, aller meiner erben nutz und gewer in ir und aller irer nackhomen nutz und gewer [mit]/ aller obemelter zwgehorung; es mag auch nw furan der vorgemelt herre Thoman, abbtt, das con[ventt]/ und all ir nachkhomen mit dem benant guet allen iren nutz und frumben gehanndeln als mit and[erm]/ iren freien aigen guet, innehaben, nutzen und niessen, versetzn, verkhawffen und geben, wem sy verl[ust]/ an mein, aller meiner erben und menigclichs von meinen [wegen irrung und hindernuss;] ich [obe-]/ nantter Lasslaw Prager und all mein erben sein auch des vorgenanten herrn Thoman, abbtt zw [Will-]/ hering, des convents daselbs und aller irer nachkhomen des obemelten guett Spieglperig, aller seiner/ zwgehorung ir rechte gewer und furstandt fur all rechtlich ansprach, wo und wieofft in des/ nottuett alsdann sollichs khawffs freis aigen und lanndes ob der Enns recht ist. Gienng in aber/ daran icht ab, des sy mit recht zuschaden khamen, denselben schaden allen zw sambt dem khawff/ sullen sy haben und bekhomen zw mir, meinen erben und darzu auf allem unserem anligunden und/ varunden guett, wo wir das haben nichtz ausgenomen trewlich und ungeverlich; zw urkundt des/ briefs gib ich obemelter Lasslaw Prager etc. dem obestimbten herren Thoman, abbtt zw Wilhering,/ dem convent daselbs und allen iren nachkhomen disen brief mit meinem aigen anhangunden/ insigil und zw merer gezewgnuss hab ich mit vleiss gebeten den edlen und vesstn Andreen/ Viechtenstainer, das er sein insigil auch an den brief gehanngen hatt, doch im und seinen/ erben anschaden. Der brief ist geben nach cristi geburde vierczechen hundert und in dem/ funffundnewntzigistem jaren an mitichen nach sandt Jacobstag des heilign zweliffbotten.