Ich Peter hern Wisidendes sun . des Chramer dem got genade . und ich Gedrawt sein hausvrowe, wir veriehen und tuen chunt allen, die disen prief ansehent, lesent, oder horent lesen, die nu lebent und hernach chunftich sint. Daz wir mit unser erben gueten willen, und gunst mit verdachtem muet, und mit unser purchherren hant, hern Mauricii, ze den zeiten apt ze den Schotten ze Wienn(en), verchauft haben ein wisen, di do leit ze Lachssendorf in dem wismad pei der huerben, do man alle jar von dient an sand Jorgen tag vier wienner phenning auf unser vrowen altar ze den Schotten ze Wiennen, ze rechtem purchrecht und niemant mer, die selben wisen haben wir geben umb fumfzehen mark silbers wienner gewichtes, ie fur die mark zwen und sibenzig grosser pehemischer phenning der wir recht vericht und gewert sein dem erbern man Chunraden dem wiltwercher purger ze Wiennen . und seiner hausvrowen . vrowen Agnesen . und allen iren Erben . furbas ledicleich und vreileich ze haben . und allen iren fruem da mit ze schaffen . mit verchauffen . mit versetzen . und geben swem si wellen . an allen irresal . und ze einer pessern sicherhait setzen wir uns. Ich vorbenanter Peter und ich Gedrawet sein hausvrowe unverscheidenleichen . mit samt allen unser Erben . uber die vorgesprochen wisen . Chunraden dem wiltwercher . und vrowen Agnesen seiner hausvrowen . und allen iren Erben . ze rechtem gewer und scherm fur alle ansprach . als purchrechtes recht ist . und der Stat recht ze Wiennen . und daz dieser chauf furbas von uns . und von allen unsern Erben . also stet und unverwandelt weleib . dar umb so geben wir dem vorverschriben Chunraden . dem wiltwercher . und seiner hausvrowen . vrowen Agnesen . und allen iren Erben . disenn prief ze einem sichtigen urchunde . und ze einem waren gezeug . und ze einer ewigen vestnunge dieser sach . versigelten . mit unserm Insigel . und mit dez ebenanten , unsers purchherren . hern Mauricii Insigel . der gezeug ist mitsampt seinem Insigel. Der prief ist geben ze Wiennen . do man zalt von Christes gebuord . dreitzehen hundert jar . dar nach in dem siben und zwanzigisten jar . an sand Niclas tag.

Source Fulltext: Peter Peusquens