Ich Dietreich der Chrannest und ich Elzbet sein hausvrowe . wir veriehen und tuon chunt allen den die disen brief lesent oder horent lesen . die nu lebent und hernach chunftich sint. Daz wir mit unser erben guoten willen und gunst mit verdachtem muot und mit gesampter hant zu der zeit do wir iz wol getuon mochten. verchauft haben unsers rechten aigens . dreizehen schillinge wienner phenninge geltes . die da ligent enhalb der wienne auf zwain heusern und auf zwain paumgarten hinden dar an . und auf alle deu und dar zu gehoret swie so daz genant ist . und mit allen den aechern die auch dar zu gehorent . und ligent ze naehst Marichartes haus an Smaltz . und haben dar zu verchauft mit unsers Gruntherren hant hern Ruedgers zu den zeiten Chapplan der Chappellen sand Nyclas in hern Chuorades haus dez Chrannestes . Neun schillinge wienner phenninge geltes purchrechtes . der drey schillinge phenninge geltes ligent auf Hainreichs haus dez smides ze naehst der padstuben vor stubenpurgtor. und sechs schillinge phenninge geltes . auf Liebhardes haus dez ledraer ze naehst Joerigen dem Paeurlein . und suln auch die Neun schillinge phenninge purchrechtes . daz erst purchrecht sein . nach dem purchrecht daz man dient den vrowen hintz sand Niclas . Die vorgenanten Gulte alle alz vor an disem brief geschriben stet . und deu mich egenanten Elzbeten anerstorben ist . von meinem vater hern Wisenten dem Chramer dem got genade . und die mich mit rechter furtzich und mit los . angevallen sind . gegen meinen Geswisteriden und gegen andern Erben do ich mit in getailt han . und die ich meinem wirt dem egenanten hern Dietreichen dem Chrannest . zu rechter Morgengab gegeben han . Haben wir ich Dietreich der Chrannest und ich Elzbet sein hausvrowe recht und redleich verchauft mit allem dem nutz und recht alz wir si in aigens und in purchrechtes gewer her pracht haben . Umb aynlef march silbers ie zwen und sibentzich grozzer pehemischer phenninge fur deu march . dez wir recht und redleich gewert sein . Den erbern mannen hern Hainreichen dem Gausraben und hern Seyfriden dem Minnganch und ir Gesellschaft uns allen irn erben furbaz ledichleich und vreileich ze haben und allen irn frumen da mit ze schaffen verchauffen versetzen und geben swem si wellen an allen irresal . Und dar uber zu einer bezzern sicherhait so setzen wir uns ich Dietreich der Chrannest und ich Elzbet sein hausvrowe unverschaidenlich mit sampt allen unsern erben uber die vorgesprochen Gulte alle . alz vor verschriben ist hern Hainreichen dem Gausraben und hern Seifriden dem Minnganch und ir gesellschaft und allen irn erben zu rechtem gewer und scherm fur alle ansprach alz aigens und purchrechtes recht ist . und dez landes recht ze Oesterreich und der stat recht ze Wienne . und geben in dar uber disen brief zu einem offen urchunde und zu einem warn gezeuge diser sach versigilt mit unserm Insigil . und mit unsers Gruntherren Insigil . des egenanten hern Ruedgers und mit meins bruoder Insigil hern Jacobs dez Chrannestes . die diser sach gezeuge sind mit irn Insigiln. Dieser brief ist geben ze Wienne nach Christes gebuort dreitzehen hundert jar in dem acht und zwaintzgisten iar dar nach an sand Blasen tage.

Source Fulltext: Peter Peusquens