Wier Albrecht von gotes gnaden, Hertzog, ze Oesterreich, ze Steyr, ze Kernden und ze Krain, Graf ze Tyrol etc. Tuen chunt, daz fuer uns chom, unser getrewr Stephan der Schekch, und gab uns auf, zwen hoef gelegen, ze Erlaffing und ain hofstat dabey, die von uns, ze lehen sind, und bat uns, fleizzichleich daz wir die verleichen geruochten, unserm getrewn, Walthern, von Seusenegg und der erbêren Dorothen seiner Swester, weilent des Poschen witiben wan er in die verchaufft hiet, das haben wier getan, und haben, demselben Walthern von Saeusenegg, der egenanten seiner Swester, und ieren erben, die vorgenanten hoef, und hofstat, verlihen, und leihen auch, waz wir in, zerecht daran leihen sullen, oder mûgen, von uns, und unsern erben, innzehaben und ze niezzen, alz lehens, und Landes recht ist. Mit urchund ditz briefs. Geben ze Wienn, an Sunntag vor sand Kathrein tag Nach Kristes gepuerd dreutzehenhundert iar, darnach, in dem vier, und achtzigisten Jare. dominus dux per se

Source Fulltext: Peter Peusquens