Wir Graf Chuonrat von Schounberch . veriehen offenlich an disem brief allen den die disen brief lesent . oder hoerent lesen . di nu lebent. und her nach chumftig sint . Daz zuo uns chomen ist . Otte von Lichtewinchel . und uns gebeten hat . ym den Hof . der da leit datz Serlingen . der uns ledich ist warden von Heinrichen . dem Tanprukker. den wir im gelihen haben ze rechtem lehen . dem vorgenanten Otten von Lichtenwinchel und seiner huosvrowen vroun Agnesen und allen iren erben . die seu mit ein ander habent als lehens Reht ist und des Landes Reht ze Oesterich . und daz . daz staet und unzebrochen belibe. dar uber geb wir im disen brief . versigelten mit unserm insigel. ze einem waren gezeug dieser sache . Der brief ist geben da von Christes gebuorde waren ergangen . dreutzehen hundert jar . dar nach in dem aht und zwaintzgisten . des Eritags vor dem Suntag Judica . in der vasten.

Source Fulltext: Peter Peusquens