Ich Alber der Stuchs ze trautmanstoerf vergich fuer mich und fuer meinen vettern Joerigen den stuchsen und fuer unser erben, offenleich an dem brief, das fuer mich komen ist die erber fraw Agnes Gundolts witib von trautmanstoerf dem got genad und hat mit meiner hant guenst und gutem willen, auf geben und gemacht recht und redleich irem suen Wulffingen, alle die lehen die sey von irem vaeter und ier mueter seligen angeeribt und an erstoriben sein und die von mir und meinem vettern Jorigen zelehen Ruerent, von erst einen hoef gelegen ze trautmanstoerff zenachst dem pharrhoef und alles das zue dem selbigen hoef gehoeret zeveld und zedoerff gestifft und ungestift versucht und unversucht wie so das genant ist und wa das gelegen ist auf dem deweschen oder auef dem ungerischen das lehen von uns ist ez sey aekcher wismad holtz pawngerten oder waid gepawen oder ungepawen . die egenanten lehen hab ich recht und redleich verlihen und verleich ouch wissentleich mit dem brief Wulffingen Gundolts suen und seinen erben fuerbas inne ze haben nuetzen und nyessen und allen iren fruemen damit zeschaffen verchauffen, versetzen und gelten wem si wellen mit mein und meins vettern und unserr Erben hannden, als lehens und des lanndes Recht ze Oesterreich ist mit urchund des briefs versigelt mit meinem anhangundem Insigel. Geben nach Kristes gepuerd drewzehen hundert jar und in dem syben und achzigisten iar am sampstag nach sand Ulreichs tag.

Source Fulltext: Peter Peusquens