Wir Brueder H(ei)nr(ich), Apt ze unser vrowen in dem Niunberig veriehen offenlichen, an disem Prief. Daz, daz unser absrift ist von der Hantvest, die wir haben uber daz Saltze ze der Halstat, umb daz Saltze, daz wir haben von den Landes Fuersten ze Osterreich, zu irr Stiftung ze unser vrowen, an dem Niunberig, und sich der Prief und Hantvest also anhebt. Wir Fridreich von gotes gnaden, Romischer Chunich, allezit ein merer des Ryches, und wir Alb(recht), und Ott, von den selben gnaden, Hertzogen ze Ostereich, und ze Steyr, veriehen, und tun chund, offenlichen, mit disem prief, Daz wir der Neustift des Chlosters ze sand Marien, in dem Neunberig, grabs ordens, daz unser stifftung ist, uns, und unsern vodern, ze selgeret, di gnad getan haben, und tun, auch mit disem prief, daz si aller ierlichen, ze unserm syeden ze Halstat, mit unser gunst und willen, nemen sullen, ein phund fueder saltzes, daz wir in da von gegeben haben, und mugen auch umb, ir aigen gut alle iar an der selben stat, chauffen ein halbz phund fueder saltzes, daz sich baidenthalben zeucht, auf zwelif phunt chueffel, des chlainen pandes, si mugen auch, daz selb saltze, daz wir in gegeben haben, mit samt dem, daz si umb ir aygen gut chauffen mugen, an allen mautsteten, auf dem wazzer von der vorgenanten Halstat untz ge(n) wienn, freilichen und an all maut furfueren, und da von enphelich wir, allen unsern mautern, und amptleuten, auf dem wazzer, daz ir in di selbe gnad also stet habet, und se an dem selben saltz in dhainen weg irret, des well wir nicht enberen und dar uber, zu einem offen urchund, geben wir in disen Prief versigilten mit unsern Insigeln. Der ist geben ze Gretz an sand Pauls tag do man zalte von Christes geburd, Dreutzehen Hundert jar, in dem Neun undzwaintzgistem iar, unsers Chunich Fridreich Reiches in dem funftzehendem iar. Dar uber so zaigen wir Bruder H(ei)nr(ich) Apt ze unser vrowen in dem Neunberig, diseu absrift, zu einer waren sache versigilten mit unserm Insigel, und mit hern Nyclas Insigel von Rorenbach dem de sache wol chund ist

Source Fulltext: Peter Peusquens