Ich Elzbet hern Stephans wittiwe des Wurffels dem Got gnade . und ich Stephan ir sun . und ich Margret hern Leupoldes hausvrowe . zu den zeiten Schreiber des erbern herren. hern Hainriches von Ratpach . der vorgenanten vron Elzbeten tochter . wir veriehen und tun chunt allen den die disen prief lesent oder horent lesen . die nu lebent und hernach chunftich sint . Daz wir mit unser erben guten willen und gunst mit verdachtem mute . zu der zeit do wir iz wol getun mochten . und mit unsers perchherren hant pruder Nichlas von Regenspurch zu den zeiten Cummentiwer datz sand Johans in der Chaerner strazze ze (Wienne) verchauft haben unsern weingarten der da leit ze Grintzingen . des ein halbes ieuch ist . und haizzet der Eysner . zenaechst dem weingarten der da haizzet der Rinch . da man alle iar von dient ein emmer weins zu rechtem perchrechte . und ainen phenninch ze voitrecht und nicht mer. Den vorgesprochen weingarten haben wir verchauft und geben . mit allem dem nutz und recht . als in unser vodern und wir in perchrechtes gewer her bracht haben . umb ain und viertzich march silbers ie zwen und sibentzich grozzer pechmischer (sic!) phenninge fur die march . des wir recht und redlichen gewert sein . dem erbaern manne . hern Perchtolden dem Pollen . und seiner hausvrowen vron Margreten . und allen irn erben furbaz ledichlichen und vreilichen zehaben . und allen irn frumen da mit zeschaffen verchauffen versetzen und geben swen si wellen an allen irresal . und sein auch wir . ich vorgenant Elzbet . und ich Stephan ir Sun . und ich Margret ir tochter unverschaidenlich . mit sampt unsern erben . des egenanten weingarten . hern Perchtoldes des Pollen . und seiner hausvrowen vron Margreten . und aller ir erben. rechter gewer und scherm fur alle ansprach . als perchrechtes recht ist. und des landes recht ze Osterreich . und daz diser chauf furbaz also staet und unverwandelt beleibe. dar umb so haben wir in geben disen prief zu einem offen urchunde und zu einem waren gezeuge . und zu einer ewigen vestnunge. diser sache versigilten mit unsers perchherren insigil pruder Nichlas von Regenspurch . und mit Jansen insigil meins pruder . und mit hern Jacobs insigil des Maeserleins . die wir des mit guten willen gepeten haben . daz si an unser stat diser sache gezeug sint mit irn insigiln. Diser prief ist geben ze Wienne nach Christes gepurt dreutzehenhundert iar . in dem dreitzgisten iar dar nach . des Suntages ze Mitter vasten.

Source Fulltext: Peter Peusquens