Wir Grafe Chuonrat . von Schowenberch . verichen offenlichen an disem Brief . allen den . die in lesent sehent oder hoerent lesen . die nu lebent . und her nach chuomftig sint . daz der beschaiden man . Chuonrat der Wiltwercher . Burger ze Wienne . uns empfolhen hat . hintz unsern genaden und trewen . allez daz guot, daz er und sein Erben von uns ze lehen habent ze Aedlesdorf in dem dorffe, des wir rechter Vogt und Lehen Herre sein, und suollen des ir scherm sein. Waer aber, daz wir niht waern, des got niht welle, und daz im dar nach, und seinen Erben, unser nachchomen Erben auf dem selben guot, dhainen gewalt oder unreht wolten tuon, so suollen se in nemen ainen vogt, ueber daz egenante guot, ze Edlesdorf, der in aller beste fuoge, und der se gescherm muog, und suollen unser nach chomen erben, se dar an nihtes ierren. Und daz die rede, staete, und untze-brochen, belibe, dar ueber geben wir in disen Brief ze ainem waren gezeuge, und uorchuonde, diser sache, versigelten mit unserm an hangendem Insigel. Der Brief ist geben ze Wienne da man zalt von Christes gebuorde, dreutzehen hundert iar, dar nach in dem dreizzgistem iare, an sand Vitalen Tage.

Source Fulltext: Peter Peusquens