Ich Rudger in dem Ampthofe, und ich Alhait, sein hawsvrowe, und ich Seifriet, amman von Obern Suefringen, und ich Wolfger von Nydern Sufringe amman, und ich Gerung der amman von Nydern Sufringe, und ich Wilhalm der amman von Salmansdorf, und ich Niclaz von Obern Sufringen, und ich Niclaz der Erman, und ich Hainreich der Prueschinche, und ich Eberger von der Neustift, und ich Wernhart des ammans sun, und ich Hainreich der Cherner, und ich Chunrad der Lange, und ich Tymein Cetler, und ich Lyebprecht von Salmansdorf, wir veriehen, und Tun chunt allen den, di disen prief lesent oder horent lesen, di nu lebent und her nach chunftig sint, das wir mit unserr erben guten willen, und gunst, mit verdachtem mute, und mit gesampter hant, ze der zeit do wir es wol getun mochten gesatzet haben, dem erbern manne, Chunraden dem Wiltwercher Purger ze Wienn und vron Agnesen seiner hausvrowen . und ir paider erben, des vorgenanten Rudgers in dem Ampthofe weingarten, der do leit ze Crotenbach, des ain halbes jewch ist, ze nehst dem wege, do man auch alle iar von dienet zwen Emmer weyns und zwen phenning dem vorgenanten Chunraden dem Wiltwercher ze rechtem perchrecht und nicht mer, fuer ain phunt geltes, das er gelobt hat, fuer uns, ze chaufen dem gotzhawes datz der heligen stat, innerhalb der mawer, oder in dem purchfride, ze Wienn . oder ze Neunburch closterhalb, inner acht tagen darnach, und die Capelle ze Sufringe wolbracht wirt, oder ze antworten auf den selben tag ze Neunburch in den sagrer zwelf phunt wienner phenninge, wir loben auch das mit unsern treven unverschaidenlichen, swas er des geldes schaden nimet . swi so der schade genant ist, das er den haben schol auf uns und auf unsern treven, und auf allem dem guet das wir haben in dem lande ze Ostirreich. Und wan wir vorgenanten leute, nicht aygern insigel haben, so verbinde wir uns mit unsern trewen, under der erbern leute insigel, hern Hainrechs des Langen ze den zeiten purger maister ze Wienn, und hern Jorgen an dem Chynmarchte deu wir des gebeten haben, das seu diser sache gezeuge sint mit irren insigeln, und gebn in dar uber disen prief ze ainem offen urchunde und ze ainer ewigen vestunge diser sache versigelten mit der vorgenanten, hern Hainrechs des Langen, und hern Jorgen insigel. Diser prief ist geben ze Wienn . nach Cristes gepurt drewzehen hundert iar dar nach in dem dreizzigisten iar, des naehsten sampstages nach sand Johann Tag, dem man haisset vor der porten.

Source Fulltext: Peter Peusquens