Ich Herman hern Christans des swertslaher sun, dem got genad purger ze Wienn, und ich Chunigunt sein hawsvrowe, wir veriehen und tun chunt allen den di disen prief lesent oder horent lesen die nu lebent und hernach chunftig sint, das wir mit unserr erben guten willen und gunst, mit verdachtem mute, und mit gesampter hant, ze der zeit do wir es wol getun mochten, recht und redelichen verchauft haben, unsern weingarten, der da leit an dem stainberge, des ain jeuch ist, und haisset der Jude . da von man dienet alle iar drithalben emmer weins in dem lesen ze rechtem perchrechte, und ainen phenning ze voyt-rechte und nicht mer, mit allem dem nutze und rechte, als wir in unversprochenlichen in perchrechtes gewer her pracht haben, umb syben und sybentzich march silbers wienner gewichtes, ie zwen und sibentzich grosser pehaimischer phenninge fuer ain ieglich march, der wir gar und gentzlichen gewert sein, dem erbern manne Chunraden dem wiltwercher purger ze Wienn . und vron Agnesen seiner haus-vrowen . und iren erben, lediclichen und freilichen ze haben und ze besitzen, und furbas allen iren frumen da mit ze schaffen, verchaufen versetzen und geben swem si wellen als in das aller peste chom und fuge an allen irresal, und durch pesser sicherhait so setzen wir uns Ich vorgenanter Herman hern Cristans sun des swertslaher, und Ich Chunigunt sein hausvrowe und Ich Nyclas sein pruder, unverschaiden-lichen mit sampt unsern erben, dem egenanten Chunraden dem wiltwercher und vrowen Agnesen seiner hausvrowen und ir paider erben, uber den vorgenanten weingarten, ze rechtem gewer und scherm fuer alle an sprach, als perchrechtes (recht) ist, und des landes recht ze Osterreich und swas in furbas dar an abe get, das sullen seu haben auf uns und auf unsern trewen, und auf allem dem guet das wir haben in dem lande ze Osterreich, wir sein lebentig oder tod, und das diser chauf und dise rede also stet und unverwandelt beleibe, dar uber geben wir, Ich vorgenanter Herman, und Ich Nyclas, hern Christans sune des swertslaher in disen prief ze ainem offen urchunde . und ze ainer ewigen Ivestunge diser sache versigelten mit unsern Insigeln. Diser prief ist geben ze Wienn nach Christes gepurt drewzehen hundert iar, dar nach in dem dreizzigisten iar, des naehsten freitages nach dem (verdeckt) (Aufvart tage)

Source Fulltext: Peter Peusquens