Wir Maritz von Gotes gnaden Aptt. und die Samnunge gemaine des Gotshaus unser vrowen. und der Schotten ze wienne. veriehen und tun chunt allen den die disen prief lesent oder horent lesen. die nu lebent und hernach chunftich sint. Daz der erbaer Ritter. her Chunrat zu den zeiten huebmaister in Osterreich. mit zeitigem Rat seiner pesten freunde. und mit guten willen und gunst aller seiner erben. zu der zeit do er iz wol getun mochte. uns. und unserm chloster. geben hat. seins rechten anerstarben perchrechtes. des in anerstarben ist. von vater und von muter. durch seiner sel. und seiner hausvrowen sel vron Preiden. der Got gnade. und durch aller ir vodern sel willen. ain viertail weingarten. mit wein mit alle. und leit an dem Nuzperge. zenaechst der Nunnen weingarten. von Tiernstain. und stozzet oben auf den weingarten. der da haizzet der Golein. da man alle iar von dient. dritthalb viertail weins zu rechtem perchrecht. und ainen phennich ze voitrecht. und nicht mer. und mit allem den nutz und recht. als er iz in perchrechtes gewer her pracht hat. und ist auch daz geschehen. mit sein perchmaisters hant. hern Chunrades des Nuzdorfer. zu den zeiten phleger des Chlosters ze Neunburch. und purchgraf auf dem chalnperge. So beschaidenlich. daz wir. und unser nachchomen. dem vorgenanten hern Chunraden dem huebmaister. und seiner hausvrowen vron Preiden. vor seinem tode. und auch dar nach. in paiden. an ainem tage. einen iartach da von begen suln. ewichlich alle iar. an dem Moentage. in der Ersten gantzen vastwochen. mit selmessen. und mit langen vigilien. die des selben tages. von uns. mit sampt den Schuelaern. nach alter gewonhait. suln gesungen werden. in aller der mazze. als iz seinem vater. und seiner muter. den paiden Got gnade. in irm geschaeft prief. auch emaln verschriben ist. Und suln auch wir aptt Maritze. oder swer nach uns aptt ist. des selben tages. der Samnunge. zwo guet richte von fischen geben. zu ir phreunte. und des pesten weins und protes. so iz unser Chloster hat. swaz ir notdurft bedarf. Wir suln auch den Schuelaern von dem Chloster. in die vigilie geben. einen Emmer weins und dem Schuel-maister. vier und zwaintzich phenninge. und dem Mesner zwelif phenninge. Auch suln wir haizzen Pachen zwelif metzen Rokken. daz man daz prot. daz da von wirt. tailn sol des selben tages under arm leute. und sechs Emmer weins. so daz aller verrist geraichen mach. Auch hat er uns und unserm Chloster. daz vorgenant viertail weingarten. geben. in der Mainunge. daz iz ewichlich da bei beleiben sol. und da von nindert verchumbert werden. weder mit verchauffen noch mit versetzen. zu dehainer zeit. wan daz nur der jartach. ewichlich da von begangen werden sol. waer aber daz. daz der vorgenanten pundt. an dem oftgenanten selgeraete von uns. oder von unsern nachchomen icht abgienge. so suln sich denne sein naechst freunt. und erben. des egenanten viertail weingarten. mit unserm guten willen. under andern. und suln iz gelten in der Purger spital ze wienne. und da von. da selbe. den egenanten irn jartach begen. nach iren triwen. so si peste mugen. waer aber daz. des Got nicht engebe. daz der Chunrat der huebmaister. in sogetan notichait. und armmuet gevielle. daz er von sein selbes gut nicht erlich. moecht bestat werden. swo er denne. inner landes sturbe. so suln wir. oder unser nachchomen. in. mit unserm gut. und mit unser mue. zu unserm Chloster pringen. und in da bestatten. nach seinen eren. und nach unsern triwen. und daz die glubde. alle. gantz und stett. von uns. und von allen unsern nachchomen. ewichlich beleiben. dar umb so haben wir geben. hern Chunraden dem huebmaister. und sein freunden. und erben. disen prief zu einem offen urchunde. versigelt mit unsern Insigiln. Diser prief ist geben ze wienne nach Christes geburt dreutzehen hundert iar. in dem dreutzgisten iar dar nach. an unsers Herren Leichnams tage.

Source Fulltext: Peter Peusquens