Ich Herbort auf der Seule. und ich Chunigunt sein hausvrowe. und ich Hainrich auf der Seule sein pruder. und ich Chlar sein hausvrowe wir veriehen und tun chunt. allen den die disen prief lesent oder horent lesen. die nu lebent und hernach chunftich sint. Daz wir mit unser erben guten willen und gunst. mit verdachtem mute. und mit gesampter hant zu der zeit do wir iz wol getun mochten. und mit unsers perchmaisters hant. herrn Jansen von Manswerde zu den zeiten obrister Chellermaister der landes fursten in Osterreich verchauft haben. unsern weingarten der da leit an dem wartperge ze Gundramstorf. und haizzet die Chranichpeunt. da man alle iar von dient. vier emmer weins zu rechtem perchrechte. und nicht mer. Den vorgenanten weingarten haben wir verchauft und geben mit allem dem nutz und recht als wir in in perchrechtes gewer her pracht haben. mit wein mit alle. umb drei und funftzich march silbers ie zwen und sibentzich grozzer pehmischer phenninge fur die march. des wir reht und redlich gewert sein. den erbaern leuten. Hainreichen dem Wurffel. und seiner hausvrowen vron Katrein. und seinem pruder Micheln dem Wurffel und seiner hausvrowen vron Trauten. und allen iren erben. furbaz ledichlichen und vreilichen zehalten. und allen iren frumen da mit zeschaffen verchauffen versetzen und geben swem sie wellen an allen irresal. und sein auch wir ich Herbort auf der Seule. und ich Chunigunt sein hausvrowe und ich Hainrich auf der Seule sein pruder. und ich Chlar sein hausvrowe. unverschaidenlich mit sampt unsern erben. des vorgenanten weingarten. Hainrichen des Wurffels. und seiner hausvrowen vron Katrein. und seins pruder Michels des Wurffels. und seiner hausvrowen vron Trauten. und aller ir erben. rechter gewer und scherm fur alle ansprach. als perchrechtes recht ist. und des landes recht ze Osterreich. und geben in dar uber disen prief zu einem offen urchunde. versigilt mit unsern insigiln. und mit unsers perchmaisters insigil hern Jansen von Manswerde. und mit hern Otten insigil des Wulfleinstorfer. und mit Hainriches insigil des hansgraven. die diser sache gezeug sint mit irn insigiln. und ander frume leute genuch den diser chauf wol chunt ist. Diser prief ist geben ze wienne. da man zalt von Christes gepurt. dreutzehenhundert iar in dem dreitzgisten iar dar nach, des naechsten Erichtages vor sand Michels tage.

Source Fulltext: Peter Peusquens