Wier Niclas zu den Zeiten Abbt datz dem Heiligenchraewtz, unde der Convent gemayn daselbns Vergehen fuer uens und all uenser Nachchoemen und tuen kunt offenleich mit dem brief Das wir von des gepotes wegen So weylent der Hochgeborn fuerst Hertzog Ruedolff selig von Oesterreich etc. in der Stat ze Wienn, umb Gruntrechts und Puerkchrechts ablosung aufgesatzt und gepoten hat Recht und redleichen abtzelosen gegeben haben, dem Erbern mann Pawln dem Holtzkaewffel, purger ze Wienn und frawn Christein seiner hawsfrawn und Jer bayder Erben Vier phunt wienner phenning geltes Puerkchrechts, die wier gehabt haben auf irem haws, daz weilent des Waechsel ist gewesen gelegen an dem Liechtensteg ze Wienn an dem Ekk gegen des von Tierna haws ueber, umb zway und dreissig phunt wienner phenning der Si uens gantz und gar verrichtet und gewert habent, Also daz Si und alle die, dye daz vorgenant Jer haws nach In ynnhabent und besitzent der egenanten vier phunt geltes fuerbaz ewichleichen darab ledig und frey sein suellen und der davon nicht mer gepunden sein ze dienen, Und schuellen auch wier noch all uenser nachkoemen noch yemant von uensern wegen fuerbaz auf das vorgenant haws umb die egenanten vier phunt geltes weder mit briefen noch uerkuent noch an brief und urkuende nymmer chain ansprach noch vodrung haben noch gewynnen in dhainem weg. Waer aber daz fuerbaz icht brief oder uerkuende fuerbracht wuerden von wem daz waer, die auf daz vorgenant haws umb die egenanten vier phunt geltes sagten dieselben brief und uerkuende schuellen denne, alsverr und sy dieselben guelt Ruerent, allerding tod und ze nichte sein und chain chrafft haben weder Chlain noch Groz. Und darueber so geben wier fuer uens und all uenser nachkomen, dem vorgenanten Pawln dem Holtzkaewffel, und frawn Kristein seiner hawsfrawen und allen iren Erben und Nachkomen die daz egenant Jer haws nach In ynnhabent und besitzent den brief zu ainem warn uerkuende der sach versigilten mit uenser obgenanten Abbt Niclas datz dem Heiligenkraewtz und des Convents daselbens bayden anhangunden insigiln. Der brief ist geben nach kristi gepuerd drewtzehen-huendert jar, darnach in dem fumf und Newntzgistem Jare des nechsten Sambstags vor dem Heyligen Palmtage.

Source Fulltext: Peter Peusquens