Ich Stephan der Poell und ich Anna sein hawsfraw Ich Hanns der Zinkk paid Purger ze Wienn und ich Barbara sein hawsfraw der egenanten Annen Swester und all unser Erben, wir vergehen offenleich mit dem brief umb die Newn phunt wienner phening geltes Purkchrechts die Brueder Hanns der Zeyrekker ze Raewn hat auf dem hindern tail des hawses gelegen in der Muenzzerstrazz ze Wienn genant des Syrveyer haws zenêchst Niclas haws des Weyspacher und die abtzeloesen sind mit Newntzig phunten wiener pheningen das wir uns des verlubt und verpunden haben und verpinden uns wissentleich mit dem brief gegen den erbern weysen..dem Purgermaister..dem Richter und..dem Rat der Stat hie ze Wienne Also ob das wêr das Si von der egenanten Nêwn phunt geltes wegen fuerbas icht chrieges oder ansprach gewunnen von wem das wêr mit briefen oder mit warer chuentschaft das wir In das alles ausrichten suellen an all ir mue und schaden und suellen Si das haben auf uns unverschaidenleich und auf allem unserm guet das wir haben in dem Lande ze Oesterreich oder wo wir es haben Es sey erbguet oder varundguet wie das genant ist, wir sein lebentig oder tod und darueber so geben wir In den brief ze einem waren uerkund der Sach versigilten mit unserr obgenanten Steffans des Poelln und Hannsen des Zinkken baiden anhangunden insigilen Und wannd wir obgenanten ich Anna und ich Barbara ir Swester selber aigen insigel nicht haben So verpinden wir uns mit unsern trewn angevêr under der vorgenanten unserr Mannen insigilen alles das stêtzehaben das vor an dem brief geschriben stet. Der geben ist ze Wienne nach kristi gepuerd drewtzehenhundert Jar Darnach in dem Sechs und Newntzgistem Jare des nêchsten Eritags vor Sand Joergen Tag.

Source Fulltext: Peter Peusquens