Wir Albrecht von gotes gnaden, Hertzoge ze Oesterreich, ze Steyr, ze Kernden, und ze Krain, Grave ze Tyrol etc. Bekennen, daz wir durch soelicher dienst willen, So unser getrewr Ulreich unser liechtkamrer, weilent dem hochgeporen fuersten, Hertzog Albrecht, unserm lieben herren und vatter sêliger gedêchtnuesse, enther langezeitt getan hat und nu uns stêtticlichen tuet, und auch hinfuer tuen sol, und haben dadurch, und von besundern gnaden, demselben Ulreichen, und zusampt Im, Gerdrauten seinr elichen hawsfrawen, und iren Erben, das haws, gelegen, an Sant Michels freythof, hie ze Wienn, das an den Egenanten unsern herren und vatter sêligen, von weilent..dem Weitmueler, und Adelhaitten seinr hawsfrawen, sêligen koemen, und nu an uns gevallen ist, gegeben, und geben auch wissenlich und lediclich mit dem brief. Also daz Si das fuerbasser, haben besitzen und niessen suellent, In aigens rechten, und damit Iren frumen schaffen und handeln muegent, mit versetzen und verkawffen und geben wem Si wellent, Als mit andrer Irer aygenhaffter hab, ane unser und unser Erben und mêniclichs widerred und Irrung, und wellen auch darueber Ir scherm sein gen mêniclichem, vor gewalt und unrecht, ane gevêrde. Doch also, daz davon jericlichen gevallen sol, auf aller heiligen tag Ain phuntt wachs, ane allen abgang und vertziehen, auf froen Alter, datz Sant Steffann, hie ze Wienn. Mit urkund ditz briefs. Geben ze Wienn an Sant Marx tag, under unsrer Pettschaft, wan wir unser Insigel nutzemal bei uns nicht hetten. Nach Cristi gepuerde drewtzehenhundert jar, darnach in dem Sechs und Neuntzigistem jare. dominus dux per se ipsum.

Source Fulltext: Peter Peusquens