Wir Wilhalm von gotes gnaden, Hertzog ze Oesterreich, ze Steyr, ze Kêrnden, und ze Krain, Graf ze Tyrol etc. Bekennen, umb das haus an Sand Michels freythof hie ze Wienn gelegen, davon man jaerikleich, an aller heiligen tag, ain phunt wachs auf fron alter zu Sand Stephan, hie ze Wienn dienet, das von..dem Weytmuelêr und Adelhaiten seiner hausfrawn sêligen, an weilent den hochgeborn fuersten, unsern lieben herren und vettern, Hertzog Albrechten sêliger gedêchtnuess, und darnach an seinen Sun, unsern vettern und uns koemen ist. Daz wir unsern tail desselben hauses unserm getrewn Uolreichen unsers yetzgenanten vettern liechtkamrer, und Gerdrawten, seiner hawsfrawn und ieren Erben, durch der dienste willen so derselb Uolreich unserm egenanten herren und vettern sêligen lang zeit getan hat, und uns noch fuerbazzer tuon sol und mag, ledikleich gegeben haben, und geben auch wissentleich mit dem brief, also daz Sy das nue fuerbazzer, in aygens rechten ynnhaben und niessen suellen, und Iren fromen damit schaffen wie In das fueget, als mit anderr Irer aigner hab, an unserr Brueder, unser, und unserr Erben, und maenikleichs hindernuess. Und wellen auch darueber Ir scherm sein vor gewalt und unrecht, ane gevêrd. Doch also, daz von demselben haus das obgenant phunt wachs, auf den egenanten altar, und auch zu der obgenanten zeit, an abgang und vertziehen jaerikleich gevall, als vorher koemen ist und davor geschriben steet an gevêrd. Mit urkund ditz briefs. Geben ze Wienn an des heiligen krêutzs tage inventionis. Nach Cristi gepuerd drewtzehenhundert jar, und in dem Sechs und newntzigistem jare.

Source Fulltext: Peter Peusquens