Jans der Mergeb purger ze Wienn und ich Katrein sein hous-vrowe wier vergehen und tuen chund allen den die disen brief lesent oder horent lesen, die nu lebent und her nach chunftig sint, das wir mit unser erben gueten willen und gunst ze der zeit do wier ez wol getuen mochten, verchauft habent, unsers rechten aygens, unsern chrautgarten der do leit ze Symoning, umb drew phunt und drei schilling wienner phenninge, der wir gar und gaentzleich gewert sein, dem erbern Manne Chunraden, dem Wiltwercher, purger ze Wienn, und vron Agnes, seiner housvrowen und ier paider erben, ledicleich ze haben, und allen iren fruemen da mit ze schaffen, an allen irresal und durch pesser sicherhait zo setzen wir uns, Ich vorgenanter Jans der Mergeb und Ich Katrein sein housvrowe, unverschaidenlich mit sampt unsern erben, dem egenanten Chunraden dem Wiltwercher und vron Agnes seiner housvrowen und iren erben zue rechtem gewer und scherm fuer alleu ansprach, als aygens recht ist, und der stat recht ze Wienn. Dar uber geben wir in desen brief ze aym offen urchunde, und ze ainer ewigen vestnunge diser sache versigelten mit unserm insigel. Der ist geben ze Wienn nach Christes gebuert dreuzehen hundert iar, dar nach in dem ain und dreizigisten jar des naehsten Phins-tages vor sand Merteins Tag.

Source Fulltext: Peter Peusquens