Ich Mert zu den zeiten Chapplan. und verweser der Chappelle unser vrowen in dem hause daz weiln hern Otten Enhaim gewesen ist. vergieh und tun chunt allen den die disen prief lesent oder horent lesen. die nu lebent und hernach chunftig sint. daz ich mit guten willen und gunst mit verdachten mute zu der zeit do ich ez wol getun mocht. und mit meins Perchmaisters hant hern Otten des Schreiber von Pentzingen verchauft han. meins rechten chaufgutes ein weingarten der do leit ze Praitense an dem altenperge. des ein halbes ieuch ist. do man alle iar von dient sechtzig phenning. fur perchrecht und fur zehenten. und drei phenninge ze voitrecht, und leit ze naechst den heiligen Gaester stathalben. und den ich gechauft han. umb ein recht ledich varunde gut. Ee mir die vorgenant Chappelle unser vrowen verliehen wart. Den selben weingarten. han ich verchauft und geben. mit allem dem nutz und recht als ich in. in perchrechtes gewer her pracht han. umb sibentzehen march silbers. ie zwen und sibentzich grozzer pehemmischer phenning fur die march. der ich recht und redleich gewert pin. dem erbaern manne Fridreich in dem Steinhaus. und seiner hausvrowen vron Neitzen. und ir paider erben. furbaz ledichleich. und vreileich. ze haben. und allen irn frumen do mit ze schaffen. verchauffen. versetzen. und geben swem si wellen an allen irresal. und pin auch ich vorgenanter Mert. des selben weingarten. Fridreichs in dem Steinhause. und seiner hausvrowen vron Reitzen. und ir paider erben. rechter gewer und scherm fur alle ansprach. als perchrechtes recht ist. und des Landes recht ze Osterreich. und daz diser chauf furbaz also staet und unverwandelt beleib. dar umb so han ich in geben disen prief zu einem offen urchunde und vestnunge versigilt mit meinem Insigil und mit meins perchmaister Insigil her Otten von Pentzingen, der diser sach gezeuge ist mit seinem Insigil, und sint auch des gezeuge. her Seifrid der pharraer von Etkendorf. her Albrecht der pharraer von Laeube. her Eberhart der Choelrer. zu den zeiten amman zu Praitense. Jorge des hubmaister schreiber. Dietmar der Schreibaer. und ander frume leut genuch. den der chauf wol chunt ist. Diser (prief) ist geben ze wienne nach Christes geburt dreutzehen hundert iar in dem zway und dreitzgisten iar dar nach des naechsten Erichtages nach des heiligen chreutz tage, als es funden wart.

Source Fulltext: Peter Peusquens